Eguraldi eta giro bikaina gailendu da gaur Amurrioko Nazioarteko Krosean. Ez da lehenengo aldia Oinkariak taldeak antolatzen duen lasterketak nazioarteko izaera duela eta EITBko zein hainbat hedabidetako kamarak ez dira falta izan.
Edonola ere, kirolariak, laguntzaileak eta herritarrak izan dira probari gatza eta piperra jarri dizkiotenak. Ehunka lagun elkartu dira adiskidetasun edo familia giroan gozatzeko, parte hartzen edo animoak ematen.
Kategoria absolutuei dagokienez, Younes Kniya izan da aurten ere irabazle, iaz bezala. Hori bai, garaipena estuagoa izan da. Emakumezkoei dagokienez, Dorcus Chepkwemoik sekulako erritmoa ezarri du eta irabaztea lortu du horrela. Iazko onena, Majida Maayouz, zazpigarrena izan da aurten.
Eskualdeko kirolarien kasuan Esti Arteta Master onena izan da lasterketa herrikoian, Naia Laso eta Haizea Solaun bigarren eta hirugarren izan dira 23 urtetik azpikoen txandan eta Uxue Abasolok proba egokituko zilarrezko domina eskuratu du.
Edonola ere, Aiaraldeko beste kirolari askok emaitza positiboak lortu dituzte, diziplina herrikoian bereziki. Sailkapen guztiak hemen kontsulta daitezke.