Amurrioko Motoclub Aialak bizkar gainean hartu du munduko SuperEnduro txapelketa antolatzeko lana. Larunbat honetan jokatuko da kirol-proba Barakaldoko BECen, eta munduko motor gidari onenak bilduko ditu hitzorduak. Tokiko sinadura bikoitza izango du norgehiagokak. Izan ere, Aiaraldeko klubaren antolakuntzaz gain, Amurrioko Udalaren babesletza ere izango du hitzorduak. Gaur egin dute txapelketaren aurkezpena Amurrioko udalbatza aretoan.
Gauzak horrela, Amurrio Kirolak marka ikusgai egongo da Bizkaia Arenako harmailetan, babesle nagusi den Eusko Jaurlaritzarekin batera. Imanol Llano Amurrioko kirol zinegotziak balioan jarri nahi izan du Motoclub Aialak herrian egiten duen lana: "Ohorea da guretzat herriko elkarte batek munduko txapelketa bat antolatzea, eta ez genuen ekitaldia babesteko aukera pasatzen utzi nahi". Guztira 8.000 lagunentzako edukiera izango du ekitaldiak, eta sarrerak Internet bidez erosi daitezke.
Eskarmentua munduko txapelketen antolakuntzan
Ez da lehenengo aldia Motoclub Aialak SuperEnduroko txapelketa entzutetsua antolatzen duela. Duela zazpi urte antolatu zuten azkenekoz Espainiako Sari Nagusia, eta beste lau edizioetan ere lanean aritu dira bertako kideak. Aitor Martinez Euskadiko Motoziklismo Federazioko presidenteordea eta Motoclub Aialako kidea egon izan da aurreko edizioen atzean eta, Aiaraldea Komunikabideari azaldu dionez, "aurtengo edizioaren antolakuntzak aukera emango die klubeko kide berriei tamaina horretako ekitaldi baten atzean dagoen lan guztia gertutik bizitzeko". Bide horretan, munduko txapelketa antolatzen duen promotore poloniarrari ere eskerrak eman nahi izan dizkio Martinezek, Aiaraldeko klubean jarritako konfiantzagatik.
Kirol-probaren atzean dagoen lan boluntario guztia nabarmendu dute, klubeko 60 kide baino gehiago mobilizatuko baitira orotara.
Bost eguneko lana dute aurretik taldeko kideek. Dagoeneko hasi dira Bizkaia Arenako argiteria eta kontu teknikoak atontzen, baina egiteko mardulena bihartik aurrera hasiko dute: zirkuituaren muntaketa. Martinezek eta Amurrioko Udaleko ordezkariek kirol-probaren atzean dagoen lan boluntario guztia nabarmendu dute. Klubeko 60 kide baino gehiago mobilizatuko dira, Martinezen hitzetan, zirkuituari forma eman eta motor gidariek gainditu beharko dituzten oztopo guztiak kokatzeko. "Maila altuko ikuskizuna izango da", gaineratu du Motoclub Aialako kideak.
Antolakuntza lanetan ez ezik, motor gainean ere izango dira amurrioarrak larunbateko hitzorduan. Horietako bat izango da Eneko Martinez AG Racing Team Beta taldeko partaide amurrioarra. Prentsaurrekoan izan da pilotu gaztea, eta Bizkaia Arenako zirkuitua "oso teknikoa" izango dela azaldu du.
SuperEnduroko munduko txapelketa ez da, ordea, Motoclub Aialaren egutegian gorriz markatutako egun bakarra. Urtero bezala, lasterketa antolatuko dute Amurrioko Jaietako testuinguruan, baita Trialeko Espainiako Kopa ere.
