40 urte beteko dira aurtengo apirilean Amurrioko Txokogorri herriko tabernak ateak zabaldu zituela. Efemeridea ospatzeko urte osoko dinamika jarri dute abian. Iragan ostiralean (urtarrilak 9) egin zuten egitasmoaren aurkezpena, mokadu eta topa batekin lagunduta.
Txokogorriko 40. urteurreneko ospakizunak borobiltzeko eguna, apirilaren 25a izango da
Lau hamarkadetako ibilbidea goratzeko dinamika "memoria eta ospakizun ariketa kolektiboa" izatea dute xede. Auzolana ardatz, dozenaka ekintza prestatu dituzte datozen hilabeteetarako. Esaterako, Txokogorriren eta Amurrioko Ezker Abertzalearen historia birpasatuko duen podcast saioa eskainiko dute tabernatik zuzenean. Hori bakarrik ez; bakarrizketak, pegatina erakusketak edota musika emanaldiak ere antolatuko dituzte. Gainera, azken urteetan Txokogorriko egutegian "ezinbesteko" bilakatutako ekintzak ere gehituko zaizkio urteurreneko programazioari; hala nola, Sagardo Eguna.
Urteurren ospakizuna borobiltzeko eguna, ordea, apirilaren 25a izango da. Oraindik asko aurreratu ez badute ere, larunbat horretan egun osoko egitaraua antolatuko dute Amurrion, eta "data gordetzeko" eskaria egin diote Txokogorriko komunitatea osatzen duten guztiei.
Buzoi gorria
"Auzolanean" eraikitako urteurrena izatea da Txokogorriko kideen nahia, eta iragan ostiralean abiatutako dinamika "bizia" izango dela azpimarratu dute. Horretarako tresnak ere jarri dituzte eskura. Buzoi gorri bat jarri dute Txokogorriko sarreran, bi helbururekin. Batetik, "40 urteko historia kolektiboaren anekdotak, argazkiak eta bestelakoak" jasotzeko. Bestetik, urteurren dinamikarako proposamen eta ideiak biltzeko. Ekarpen oro "ongi etorria" izango dela azpimarratu dute.
Garagardo kluba
Urteurren ekintzetatik aparte, egitasmo berri gehiagorekin abiatu du 2026a Txokogorri tabernak. Abenduan Birra Gorri kluba jarri zuten martxan, Txokogorriko garagardo kluba.
Aspaldian garagagardoen inguruan burututako ekimen desberdinetatik sortutako giroak bultzatuta eman dute kluba garatzeko urratsa. "Garagardozaleen elkargunea" izateko asmoz sortu dute Birra Gorri; "garagardoen mundua hurbilago ikusteko eta ezagutzeko, garagardo ezberdinak dastatzeko aukerarekin".
Klubeko kideek, hilabeteko 10 euroko kuotaren truk, garagardo bereziak dastatzeko, eskaintza desberdinetan parte hartzeko edota bestelako ekimenetan parte hartzeko aukera izango dute. Izena eman nahi duen orok Txokogorriko barran aurkituko du klubeko inskripzio orria.