San Antonen Lagunak elkarteak ohiko elkartasun enkantea egingo du igandean, baina ekimen hori indartzeko, asteburu osoa hartuko du. Larunbatean hasiko dira ekintzak 12:00etan, meza abestuarekin eta 13:00etan hitzaldia eskainiko dute San Anton baselizaren historia azaltzeko. Ondoren, 14:00etan, bertaratutakoek txakolina dastatu ahal izango dute.
Kirola eta parranda
Larunbatean bertan jarraipena izango du egitarauak. 18:30ean udal frontoia betetzeko deia zabaldu dute. Izan ere, herriko etorkizun handiko pilotariek erakutsiko dituzte euren gaitasunak. Hegoa Roiz eta Itxaso Iribarren Eider Perez eta Malen Gonzalezen kontra lehiatuko dira.
Larunbatean bertan jarraipena izango du egitarauak. 18:30ean udal frontoia betetzeko deia zabaldu dute. Izan ere, herriko etorkizun handiko pilotariek erakutsiko dituzte euren gaitasunak.
Gero, egungo 4 eta 1/2ko txapeldunak, Enara Gamindek eta Alize Sagarduik, indarrak neurtuko dituzte Amaia Aldai eta Miriam Arrillagarekin.
Amaitzeko, triki poteoa egongo da Ander eta Vanessarekin 21:00etan.
Igande bizia
Edonola ere, aurreko eguneko egitarau oparoa igandeko hitzaurrea baino ez da izango. 09:00etan hasiera emango diote Putxeren II. Lehiaketari. 13:00etan amaituko da eta 14:30ean egingo dute sari banaketa. Izena ematea 687 580 060 telefonora deituta egin daiteke 10 euroren truke eta gaur amaitzen da epea.
Halaber, 10:00etan irekiko dute 80 salmenta postuz osatutako azoka eta 12:00etan Ugarte Otxotearen unea helduko da.
Interes gehien sortzen duen ekintza, hau da, produktuen elkartasun enkantea, 12:30ean abiatuko dute. Aurten bildutako dirua Aiala Síndrome X Frágil elkarteari emango diote. Txerriaren zozketa, berez, 14:30ean izango da.
Elkartasun txosna
Egitaraua arratsaldera arte luzatuko da, 17:00etan Otegiren dantzaldia egongo baita. Elkartasun txosnak funtzionatuko du eta dirua Ezina Ekinez Egina elkartera bideratuko dute.