Mirari Gotxi txirrindulari amurrioarrak amaitutzat eman zuen ziklokros denboraldia larunbatean Herbehereetan, Hulst hirian, hain zuzen. Bukaera hori egiteko hitzordu paregabea izan zuen eta Munduko Ziklokros Txapelketan parte hartu zuen, baita 25. postua eskuratu ere.
Gazteak aitortu dio Aiaraldea Komunikabideari pixka bat nekatuta heldu zela, baina emaitzak positiboak izan zirenez, pozik dago. Berez, berarentzat txapelketan egote hutsa saria zen.
Lasterketari dagokionez, uste du parte hartze ona izan zuela: "Indarrarekin sentitu nintzen, baina sortu ziren bi oztopoek pixka bat atzean utzi ninduten". Izan ere, Gotxi 17. postuan abiatu zen bere puntuazioari esker, baina istripu batek dena aldatu zuen: "Atera ginenean, bide osoa hartu zuen erorketa bat egon zen zubian eta atzean gindoazenak geldirik geratu ginen".
Gauzak horrela, Gotxik hurrengo erronkak ditu buruan jadanik errepideko sasoirako: "Denboraldi polit eta ona egitea eta saiatzea Espainiako Selekzioarekin nazioarteko lasterketetara joaten".