Aparteko nobedaderik gabe igaro da Tubos Reunidoseko Enpresa Batzordearen eta zuzendaritzaren arteko bigarren bilera. Multinazionalak pizgarridun bajak eta aurre-erretiroak eskaini ditu 301 kaleratzeak bideratzeko, baina sindikatuek esan dute ez dutela aukera hori baloratuko. Izan ere, uste dute enpresak ez duela kaleratzeak justifikatzeko haina argudiorik eman.
ELA
ELAk nabarmendu du orain arte eskainitako informazioa "erabat eskasa" dela eta ez dela planteatutako neurriak justifikatzen dituen bideragarritasun plan errealik plazaratu. Horrekin batera, sindikatuak nabarmendu du altzairutegiaren itxierak proiektu industrial osoaren etorkizuna kolokan jarriko lukeela, eta orain arteko aldarrietan mantendu da: espedientea kentzea eta "enplegu guztia bermatuko duen industria plan bat" garatzea.
LAB
Antzeko terminoetan mintzatu da LAB ere. Sindikatu abertzalearen ustez, gaurko bileran agerian geratu da "krisiaren errelatoa ez dela sostengatzen" eta enpresak ez dituela Enplegua Erregulatzeko Espedientearen kausak justifikatu. Langile erakundeak azaldu du informazio eskaera formal bat egin diotela enpresari, bideragarritasun plana eta beste hainbat txosten falta direla iritzita. Horrekin batera, arreta desbideratzea leporatu diote zuzendaritzari, balizko kalte ordainetaz hitz egitera pasatu delako. Horren harira, LABek ziurtatu du ez direla eztabaida horretan sartuko jokoan dagoena "askoz larriagoa" denean.
Horren aurrean, LABek aldarrikatu du erantzuna "kolektiboa" izan behar duela, "dimentsio handiko eraso" baten aurrean daudela iritzita. Horregatik, "antolatuta, informatuta eta batuta" mantentzeko deia luzatu diete langileei.
ESK
Oso antzeko irakurketa plazaratu du ESK-k ere, eta azaldu du ez dutela enpresaren planteamendua baloratu ere egingo, multinazionalak bilatzen duena "kostuak etorkizuneko bideragarritasuna bermatu gabe murriztea" delako. Era berean, sindikatuak salatu du enpresak ez duela "datu bat bera ere ez" eman zorra berregituratzeko egiten ari denaren inguruan, "nahiz eta, paradoxikoki, enpresak berak seinalatu duen berregituraketa hori funtsezkoa dela bere jarraikortasunerako".
Egun osoko lanuztea
Goiz luzea izan da gaurkoa Tubos Reunidoseko piketean. Langileek 24 orduko greba egin dute, erabateko jarraipenarekin, eta txistu eta oihu artean egin diete harrera zuzendaritzako kideei: