Amurrioko Udalak egin du herriko jaien kartel lehiaketako deialdia eta diseinu zein sorkuntza profesionalei bideratu du. Banaka zein estudioetan eta lan taldeetan prestatu ahalko dira. Aurtengo oinarriek espresuki debekatu dute sorkuntzan adimen artifizialeko tresnak erabiltzea.
Hautagaitzak aurkezteko epea 2026ko martxoaren 30ean hasi eta apirilaren 17an amaituko da.
Hautaketa prozesua hiru fasetan banatuko du erakundeak. Lehenengoan, interesdunek portfolioa aurkeztu beharko dute curriculum laburrarekin eta motibazio gutuna erantsita.
Ondoren, aditu-batzorde batek hiru hautagaitza finalista aukeratuko ditu, eta ibilbide profesionala, sormen-kalitatea eta lanak eskaerara egokitzea baloratuko ditu.
Finalistentzako dirua
Finalista bakoitzak diru-kopurua jasoko du zirriborroa sortzeko, 300 euro zehazki. Azken fasean, aukeratutako porfesionalek kartelaren proposamena aurkeztuko dute.
Lan bakoitza baloratzeko orduan irizpide artistikoak, jaietako elementu tradizionalen integrazioa, publizitate funtzionaltasuna, kalitate tipografikoa eta balio sozialen eta berdintasuna hartuko dituzte aintzat.
Proiektu irabazleak 2026ko Amurrioko Jai Nagusietako kartela diseinatzeko enkargu ofiziala eta diru-kopuru gehigarria jasoko ditu, 800 euro, alegia. Hau da, proiektu irabazleak 1.100 euroko saria izango du guztira. Lanak originalak eta argitaratu gabeak izan beharko dira.