Eusko Jaurlaritzako Industria Sailburuak hitza hartu du gaur Legebiltzarrean EAJk berak egindako galdera erantzuteko Tubos Reunidos enpresari buruz. Mikel Jauregik azaldu du egoera oso zaila dela eta Espainiako Gobernuko ministerioekin elkarlanean ari direla. Guztien aburuz, neurri bakarra da inbertsoreak erakartzea.
Edonola ere, Jauregik aipatu du Donald Trumpen muga-zergek eta metatutako zorrak asko zailtzen dutela erantzuna.
Erakundeen arteko irtenbidea
Sailburuak ziurtatu du konponbidearen bila ari direla eta horrek ministerioen arteko elkarlana zein Europar Batasunaren irizpideekin lerrokatzea exijituko duela. Dena den, Gobernu espainiarraren borondate ona eskertu du.
Jauregik erantsi du eskarmentua dutela formula berritzaileak topatzen herri proiektuek aurrera egin dezaten, eta espero duela berriro egitea Tubos Reunidosekin. Halaber, adierazi du ahalik eta lasterren egin behar dutela, kaleratze arriskuan dauden 301 pertsonak aipatuta.
Estatu dirulaguntzak
Eusko Jaurlaritzako kideak zerrendatu dituen oztopoen artean bi nagusi daude. Alde batetik, enpresako zuzendaritzak sortu duen zorra, burtsan duen balioa gainditu duena. Bestetik, Europar Batasunak ez dituela ahalbidetzen estatu dirulaguntzak.
Mobilizazioak gaur
Erakundeen erantzunak azaleratzen diren bitartean, Tubos Reunidoseko langileek lanuzte eta mobilizazioekin jarraitzen dute. Gaur manifestazioa egin dute 10:30ean faktoriatik Amurrioko Udaletxera, non alkatearekin bildu baitira.
Horrez gain, gaur 19:00etan eskualdeko mobilizazioa deitu dute.Aamurrioko San Jose auzuneko errotondan izango da hitzordua eta Tubos Reunidoseko langileek bat egingo dute Maderas de Llodioko beharginekin.