Gaur bilera luzea izan dute Tubos Reunidoseko zuzendariek eta langileen ordezkariek, baina ez da bereziki emankorra izan, sindikatuek Aiaraldea Komunikabideari azaldu diotenez. Berez, zuzendaritzak kaleratzeen kalte-ordainak hobetzeko eskaintza eraman du mahaira, baina sindikatuen ordezkari orok ezezko borobila eman dio proposamenari. Aipatu dutenez, azken proposamen horren epea martxoan 2an amaitu behar zen, hau da, kontsulten prozesua baino astebete lehenago.
Horrez gain, aurreko batzarrean agertutako korapiloek askatu gabe jarraitzen dute. Langile erakundeek uste dute enpresak hartu nahi dituen neurriak ez daudela argudiatuta eta funtsezko informazioa falta dela.
Konpainiak dokumentazio gehiago eman die sindikatuko kideei eta hauek aztertu beharko dute, baina oraindik ere euren iritzia da Tubos Reunidosek ez diela azaldu zergatik itxi behar den altzairutegia ezta zeintzuk diren logistika kanpo enpresa batekin kontratatzeko arrazoiak. Halaber, ez dute zehaztu zein hornitzailek ekoiztuko duen altzairua.
Dirudienez, zuzendaritzak aipatu du hurrengo bileran, ostegunean, Deloitte enpresako ordezkari batek parte hartuko duela, aholkularitza konpainia horrek osatu baitu kaleratzeen dokumentazioa.
Gaur 24 orduko greba egiten ari dira Tubos Reunidoseko langileak. Goizean piketean egin dute fabrikako sarreran, eta txistu eta oihu artean egin diete harrera multinazionaleko zuzendaritzako kideei:
Bihar beste hitzordu bat Reforren
Mobilizazio zikloak ez du etenik eskualdean eta bihar 08:15ean Tubos Reunidoseko ordezkariek eta langileek elkar ikusiko dute berriro, baina Reforren.
Han izango da Arabako Foru Aldundiak deitutako Aiaraldeko Industria Mahaia eta Tubos Reunidoseko eta Maderas de Llodioko beharginek aldarrikatuko dute eskualdeko 336 lanpostu arriskuan daudela.