Ategin elkarteak batzar irekia egingo du ostiralean 19:30ean Amurrioko Katekesi Aretoan bere jardueraren berri emateko. Izan ere, taldeak hamasei familia lagundu zituen iaz etxebizitza lortzen.
Aiaraldea Komunikabidea Juan Carlos Ruiz elkarteko kidearekin mintzatu da eta honek azaldu du solasaldiaren zati batean iaz egindakoa azalduko dutela: "Finean, gure lana bi ildotan banatzen da. Alde batetik, Amurrioko parrokiak dituen bi etxebitzetan lau familia hartu ditugu, ezin zutelako etxerik eskuratu. Bestalde, bitartekari lanak egin ditugu higiezinen jabeen eta etxebizitza lortzeko zailtasunak dituzten hamabi familiaren artean. Guk bermatzen diegu kobratuko dutela, jabe asko beldur baitira."
Ruizek nabarmendu du euren lana bereziki bideratua dagoela etorkinak laguntzera: "Kanpotarra bazara eta paperik ez baduzu, ezinezkoa da etxebizitza duina izatea".
Ategin elkarteko kideek ez ezik, Javier Madrazo Etxebizitza sailburu ohiak ere hartuko du hitza. Madrazo Ibarretxe Lehendakariarekin hartu zituen ardura horiek eta Ezker Batuko burua zen garai horretan. Juan Carlos Ruizek argitu du gonbidapena egin diotela egun eurek lantzen duten esparruan ere aritzen delako Kolektibo 47 etxebizitza denontzat elkartearekin.