Bilbon izan da gaur berriro Tubos Reunidos enpresako langileen mobilizazioa. Hain zuzen, 11:30ean elkarretaratzea egin dute konpainiaren bulego nagusien aurrean. Polizia ugari bertaratu da eta tentsio une txikiak bizi izan dira Langile Batzordeko kideek saiakera egin dutenean bulegoetara jotzeko.
Azkenenean, sindikatu bakoitzeko kide bana sartu da eraikinera eskutitza uztera. Barruan inor ez zegoenez, ate azpitik utzi diete mezua.
Hain zuzen, eskutitzarekin sindikatuek berretsi dute ez dutela negoziatuko kaleratzerik eta konpainiak ez duela oraindik frogatu neurri hori beharrezkoa denik.
Hori izan da behin eta berriro nabarmendu dutena. Izan ere, zenbait hedabidek atzo kontrakoa zabaldu zuten, nahiz eta sindikatuek ez zuten horrelakorik adierazi.
Mobilizazioak eta batzar orokorra
Asteburuan atsedena hartuko badute ere, hurrengo astea gogor hasiko dute langileek. Berez, lanuzteekin batera, BECera joko dute astelehenean 09:00etatik 11:00ak arte, Nazioarteko Makina-Erremintaren Bienala hasiko baita eta euren aldarrikapenak ikusgarri egotea nahi dute.
Horrez gain, beste hitzordu inportantea izango dute 15:30ean, batzar orokorra deitu baitute eta erabaki garrantzitsuak hartuko dituzte negoziazio prozesua agortzen denerako, besteak beste, zein mobilizazio eta lanuzte motak egingo dituzten.
Hurrengo bilera enpresa eta alde sozialaren artean Euskalduna Jauregian izango da berriro.