Gaur beste mobilizazio egun bizi bat izaten ari dira Tubos Reunidoseko langileak. Gogoratu beharra dago greba eguna dutela eta hori baliatu dute euren presentzia biderkatzeko.
Goizeko bostetan Trapagarango multinazionaleko fabrikara jo dute LAB eta ESK hango sindukatuen greba babesteko. Grebalariek eurek azaldu dutenez, Ertzaintzaren presentzia handia egon da eta tentsio uneak bizi izan dituzte behargin batzuekin, haserretu direnak "eskirol" gisa izendatuak izan direnean.
Horrez gain, 08:30ean Bilboko Euskalduna Jauregian batu dira. Izan ere, gaur eraikin horretan egiten ari dira bilera langileen ordezkariak eta zuzendaritza, enplegua erregulatzeko espedientearen kontsulta epea indarrean baitago. Azken bilera astelehenean izango da.
Batzarrak iraun bitartean, Eusko Jaurlaritzako egoitzara jo dute grebalariek. Han Txurdinagako Institutuko ikasleek egin dute topo, hezkuntza zentroaren etorkizunaren aldeko protesta egiten ari baitziren. Gero Euskaldunara itzuli dira, informazioa jasotzeko.
Argazkiak: Tubos Reunidoseko langileak, Aitor Aspuru Saez