Tubos Reunidos enpresaren egoera eztabaidagaia izan da gaur Eusko Legebiltzarrean. Izan ere, EH Bilduk proposatuta, akordioa lortu dute koalizio subiranistak, EAJk eta PSE-EEk.
Babestutako testuaren oinarriak dira lan gatazkarekin zerikusia duten alde guztien inplikazioa bultzatzea irtebide bat bilatzeko, Aiaraldeko Plan Estrategikoa guztiz garatzea eta inbertsioak egikaritzea eta Eusko Jaurlaritzak Europar Batasunean euskal industria siderurgikoa defendatzea. Azken puntu horrek, zehazki, exijitzen du altzairuaren merkatuaren erregulazioari buruzko eztabaidan euskal industriaren interesak babestea, altzairuaren deribatuei Karbonoaren Mugak Doitzeko Mekanismoa aplikatzeko eta industria elektrointentsiboaren kostuak murrizteko neurriak sustatzeko.
Sumar koalizioak prentsa oharra zabaldu du jakinarazteko abstenitu dela bozketan, bere ustez testua ez delako nahikoa. Sumarren iritziz, kaleratzeak gelditzea eskatu beharko litzaioke enpresari.
Mobilizazioek ez dute etenik
Lan gatazka eztabaida politikora heldu bitartean, Tubos Reunidoseko langileek jarraitzen dute protestak antolatzen. Bihar 11:00etan Bilbon egongo dira, Sabin Etxean.
Astelehenean, aldiz, greba eguna deitu dute, espedientearen kontsulta epearen azken bilera izango baita eta Euskalduna Jauregira mugituko dira. Asteartean beste greba egun bat egingo dute eta Tubos Reunidosen bulegoetara joko dute, Bizkaiko hiriburuko Maximo Agirre kalera. Ostegunean, martxoaren 12an, Gasteizen izango dute elkarretaratzea, 18:30ean.