Astelehenetik aurrera ekoizpena erabat gelditzea izango da langileen helburua Tubos Reunidoseko fabrikan Amurrion. Horrela erabaki du gaur Langile Batzordeak. ELAk, LABek eta ESK-k protesta eredu horren alde egin dute eta CCOO eta UGT sindikatuek, ados ez egon arren, gehiengoaren erabakia errespetatu eta onartu dute.
Aipatu beharra dago zuzendaritzak 301 langile kaleratzeko asmoa iragarri zuenetik lau orduko eta 24 orduko lanuzteak uztartu dituztela presio neurri gisa.
Batzar orokorraren ondorioa
Erabakia gaur 10:30ean egindako batzar orokorraren giroaren emaitza izan da, langileek horren aldeko jarrera agertu baitute. Behin beharginen iritziak entzun eta gero, etenaldia egin dute.
Tarte horretan sindikatuen ordezkariak elkartu dira eta banaka euren iritzia partekatu dute. Horren ondoren, egiaztatu dute gehiengoak greba mugagabearen alde zegoela eta erabakia langileekin partekatu dute.
Berez, Tubos Reunidosen greba asteazkenean abiatuko dute, baina martxoaren 16an bazuten 24 orduko lanuztea deituta eta martxoaren 17an Euskal Herrian greba orokorra aurreikusita dagoenez, lotuko dituzte deialdi guztiak.
Gaur protesta
Goizeko batzarra amaituta, langileen mobilizazioa ez da amaitu, gero 16:45tik 18:30ak arte kontzentratuko baitira Zamudioko Parke Teknologikoan.