Mugarri historikoa lortu du Jesus Balado amurrioarrak Europako Setter Gordon txapelketan: kategoria guztietan eskuratu du lehenenego postua. Hain zuzen ere, txakur gazterik onena eta txakur heldurik onenak (arra zein emea) izan dira Baladorenak. Taldekako garaipena ere lortu du, Espainiako selekzioarekin.
Aurtengo txapelketa Suitzak antolatu badu ere, Toledoko Las Ventas de Retamosa udalerrian izan ziren probak, bertako gari-lursailen egokitasuna dela eta. Suitza, Frantzia, Italia, Alemania, Norvegia eta Espainiako parte hartzaileak lehiatu ziren, aurretik norbere herrialdean sailkatu ostean.
Esan bezala, kategoria guztietako dominak kolkoratu ditu Baladok, eta noski, bere txakurrek: Ilia de Biaska izan da txakur gazterik onena eta baita txakur emerik onena ere. Arco de Biaska, ordea, txakur arren artean puntuaziorik altuena lortu du. Bi animaliak dira amurrioarraren etxean jaio eta hezitakoak.
Ez da Balado txapelketa honetan gailentzen den lehenbiziko aldia: 2022an Alma de Biaska txakurrarekin irabazi zuen, eta 2024an Arco de Biaskarekin.
Setter Gordon txapelketak
Setter Gordon txapelketetan, proba bakoitzaren hasieran, txakurra gari-lursail batean askatzen da, eper basati baten bila. Txakurrak hegaztiaren usaina hautematen duenean non dagoen erakutsi behar du. Mugitu gabe egon behar du gidaria hurbildu arte, hau da, eperra askatu eta hegan egiten hasten den arte. Une horretan, animaliaren autokontrola probatzen da: txakurrak tinko jarraitu behar du, eta ez du atzetik abiatu behar. Prozesu horretan, hainbat dira epaileek kontuan hartzen dituzten faktoreak, hala nola lursailetik mugitzeko duen modua, usaimenaren kalitatea, obedientzia, estiloa eta dotorezia.