Amurrioko Mendiko Eskolak 55. urteurrena ospatuko du aurten. Mende erdia ospatzea zen antolaketa lanetan ari den guraso elkartearen xedea, baina COVID-19aren pandemiak asmoak galarazi zituen orduko hartan.
Aurtengoan, ordea, inolako oztoporik gabe ospatu ahalko dute ikastetxearen ibilbidea. Ekainaren 6an egingo dute ospakizun festa, "egun osoko egitarau oparoarekin", aurreratu dutenez.
Kamiseta bereziak
Mendiko Eskolako guraso elkarteak 55. urteurrenerako kamisetak prestatu ditu, ekaineko festa handia dotore janzteko asmoarekin. Dagoeneko publiko egin dute kamisetaren diseinua, eta hauen aurresalmenta egingo dute martxoaren 31n eta apirilaren 14an. Eskolako patioko jolas-parkean jarri dute horretarako hitzordua, 16:15etatik 17:00etara. Kamiseten neurriak bertan frogatzeko aukera egongo dela ere jakinarazi dute, haurrenak zein helduenak. Aurresalmenta egunetan bertaratzerik ez duenak, aukera izango du ere eskolako idazkaritzan eskaria egiteko. 10 euroko prezioa izango dute.
Guraso elkartetik urteurren ospakizunera batzeko deia luzatu diote eskola komunitate osoari.