Prentsa ohar bana plazaratu dute Amurrioko Udal Gobernuak eta Eusko Jaurlaritzako Segurtasun Sailak, “egun hauetan udalerriko kaleetan Ertzaintzaren aurka agertu diren pintadak gaitzesteko”.
Segurtasun Sailak zehaztu duenez, Refor kirolguneko futbol zelaian agertu dira margoketak, eta ertzain zehatz bat seinalatzen dute. Gainera, erakunde publikoak nabarmendu du ez dela agente hori seinalatzen den lehen aldia, eta gaineratu du horrelako gertakariek “Euskadin igarotako garaiak gogora” ekartzen dituztela.
Tokiko udal gobernuak ere azaldu du horrelako ekintzak “behin baino gehiagotan” errepikatu direla udalerrian. Horren aurrean, EAJ eta PSE-EEk osatutako gobernuko kideek aldarrikatu dute Amurrio “elkarrekiko errespetuan, aniztasunean eta balio demokratikoetan oinarritutako bizikidetza-gunea” dela.
Gauzak hala, salatu dute horrelako “ekintza bandalikoek, ondare komuna hondatzeaz gain, konfrontazioa erein eta komunitate gisa defendatzen dugun errespetu instituzional eta sozialaren oinarrizko printzipioak ahuldu” nahi dituztela, eta ziurtatu dute ez dituztela normalizatuko.