Kalean dira Araba Euskaraz jaiaren abestia eta bideoklipa. Gaur bertan aurkeztu dituzte biak Guk eskulturaren ondoan egindako ekitaldian. Aresketa Ikastolako ikasleekin batera, Igon Olaguenaga eta Txiki Lora abestiaren sortzaileek hartu dute plaza.
Aurtengo edizioaren leloa darama kantak izenburuan: Taupadak berpiztu!. Izan ere, “abestiaren letra euskararen biziberritzeko beharrari dei zuzena” dela adierazi dute antolatzaileek. Hala, 1960ko hamarkadako berpizkundea gogora ekarri eta egungo egoerari buruzkohausnarketa egin nahi dute, etorkizunari begira “gogoa eta kuraia” aldarrikatuz. Ekainaren 14ko zita berezia girotzeko, abesti “dantzagarri eta anitza” sortu nahi izan dute. Hori dela eta, saltsa generoko erritmoak ditu abestiak oinarrian baina hainbat dira nahasten diren doinuak: alboka, trikia, tronpeta, tronboia eta perkusio latinoa, besteak beste.
Igon Olaguenaga eta Txiki Lorarekin batera, hainbat dira kantan parte hartzen duten musikariak, hala nola Amaia Santamaria (ahotsa), Rodrigo Ulises (perkusioa), Yago Salorio (baxua), Marcos Ortega (tronpeta), Fernando Blanca (tronboia), Ibon Koteron (alboka), Joseba Tapia (trikitia) eta Iñaki Otxondorena “Moro”(letra eta ahotsa). Ikastolako gaztetxok ere haien doinurik onenak eman dituzte koruetan. Eneko Martinez Aresketako ikasle ohia arduratu da bideoklipaz, eta “ikastolako sorreratik lanean jardun duen komunitate osoari” egin nahi izan dio aitortza.