40 urte bete dira aurten Amurrioko Txokogorri herriko tabernak ateak zabaldu zituenetik. Urte hasieratik "memoria eta ospakizun dinamika" abian jarri bazuten ere, bihar egingo dute lau hamarkadako ibilbidea ospatzeko jai nagusia, egun osoko egitarauarekin.
Goizeko hamarretan abiatuko dute eguna, txupina jaurtitzearekin batera. Segituan emango diote hasiera tortilla txapelketari eta erronka luzatu diete parte-hartzaileei: "Ezetz Txokogorrikoak baino goxoagoak egin!"
Bi ordu izango dituzte lehiakideek tortillak entregatzeko. Goizean haurrentzako jolas eta puzgarriak ere egongo dira, Kirikiñoren eskutik.
Alboka eta pandero doinuz girotuko dute eguerdia, eta eguneko ekitaldi nagusia egingo dute 13:30ean. Horren ostean, 14:30ean, Txokogorriko komunitatea osatzen duten 100 lagun baino gehiago bazkaltzeko elkartuko dira.
Bazkalostean egingo dute enkantea eta azken asteetan saldutako bonolaguntzen zozketa, eta sari ezberdinak irabazteko aukera egongo da: kalitate goreneko produktu sortak, bi pertsonentzako menua Guzurtegi jatetxean, BirraGorri klubeko 3 hilabeteko harpidetza edota 10 gosarirako bonoa.
Hortik aurrera, musika izango da protagonista: Andoni Ollokiegiren kantuak arratsaldea hasteko, Belgorri eta Ez Dok Bape taldeen kale kontzertuak, Otxote Ugarterekin batera afari musikatua eta DJ Maratoia egunari amaiera emateko.