Mendiko Eskolak 55 urte bete ditu aurten eta hezkuntza zentroko arduradunek hamarkada hauetan egindako ibilbidea gogoratu eta goraipatu nahi dute ekainaren 6an ospatuko duten jaiarekin.
Komunitate osoa batu nahi dute egun horretan (ikasle eta irakasle ohiak, familiak...) eta gogoratu ikastetxearen historia 1970ean hasi zela: "Garai hartan “La Comarcal” izenez ezagutzen zen eskola. Ordutik hona, eskola hazi, eraldatu eta egokitzen joan da, Amurrioko eta Aiaraldeko errealitatearekin batera. Euskara, hezkuntza publikoa, inklusioa eta komunitatea izan dira beti gure ardatzetako batzuk, eta belaunaldi askoren bizitzaren parte izateko aukera izan dugu".
Horrez gain, Mendiko Eskolak beste proiektu batzuk barnebiltzen dituela ere azpimarratu dute: "Lucas Rey, Lucio del Alamo eta Matias Landaburu bezalako ikastetxeen ibilbidea ere gure historiaren parte da. Izenak, eraikinak eta egiturak aldatuz joan diren arren, belaunaldiz belaunaldi mantendu dena komunitatea bera izan da. Bide horren guztiaren ondorioz, 2020an hartu zuen ofizialki Mendiko Eskola izena".
Egitarauari dagokionez, honako hau iragarri dute:
- 11:00 // Hasiera ekitaldia
- 12:00 // Poteo musikatua herrian, erakusketa eskolan eta umeentzako jarduerak
- 13:00 // Ikasle berriei harrera eta 6. mailakoei agurra
- 13:45 // Herri bazkari txikia (12 urteko bitartekoentzat)
- 14:30 // Herri bazkaria helduentzat
- 15:00 // Puzgarriak
- 16:00 // Bingoa eta zozketa
- 17:00 // Apar festa
- 18:00 // DJ
- 20:00 // Bixkor Txaranga
Herri bazkariko tiketen prezioa bost eurokoa izango da umeen kasuan eta hamabostekoa helduen artean. Mendiko Eskolan eta Guk tabernan daude salgai edo Rural Kutxan egin daiteke diru sarrera izen eta abizenak adierazita (ES76 3008 0214 1357 4231 3728 kontuan).