Bihar greba mantendu duten sindikatuek bilera egingo dute langile guztiekin eta, momentuz, ESK-k bere planteamendua zein den iragarri du prentsa ohar bidez. ELAk zein LABek euren afiliatuekin bilerak egin dituzte eta adostu dute zer proposatuko duten, baina ez dute zabalduko Tubos Reunidoseko behargin ororekin batu arte.
ESK-k, bere aldetik, berretsi du greba jarraitzea dela bere hautua, helburua nagusia enplegua erregulatzeko espedientea bertan behera geratzea delako. Hartzekodunen konkurtsoa hasi zenetik neurri hori eten da, baina ez da desagertu, zuzendaritzak dokumentazioaren barruan sartu baitzuen.
Gauzak horrela, ESKren aburuz, espedientea mehatxu bat da eta lanuzteek jarraitu behar dute.
Altzairutegia eta logistikarekin aurrera egin
Sindikatuak uste du espedientea berriro aktibatuz gero, hartzekodunen konkurtsoak ez lukela enpresa salbatuko, zatituta geratuko litzateke eta, behin altzairutegia itxita eta logistika kanporatuta. Hori gertatuko balitz "Tubos Reunidosek ez luke industria etorkizunik", adierazi du ESK-k.
Antolakundeak gogoratu du maiatzaren 26an bilera dagoela zuzendaritza eta administrariarekin eta orduan espedientea bertan behera geratuko balitz, bestelako egoera sortuko litzateke, baina ez gaur gaurkoz.
ESKren iritziz, grebari eusteak ahalbidetuko du administrariari erakustea langileak antolatuta daudela eta lantegia defendatzeko prestutasuna dutela. Halaber, sindikatuak salatu du kinka ez dela greba edo enpresa ixtea, azken horren ardura zuzendaritzaren kudeaketa penagarria izan baita. ESKren ustez, greba da lanpostuak babestea industria txikizioaren kontra eta administraria presionatzeko dagoen bide bakarra, jarduera baldintzatzeko modua baita.