Euskal Jaiaren 2026ko edizioa ate joka dago honezkero. Aiara Dantza Taldeak egun osoko egitaraua prestatu du biharko (maiatzak 23) Amurrion, dantza eta euskal kultura ardatz. Atzo arratsaldean ekin zieten beroketa lanei, Otxote Ugartek girotutako kantukada eta pintxopote berezian.
Larunbata bertako produktuen azokarekin abiatuko dute. 10:00etatik hasita eta 14:00ak arte dozenaka artisau eta tokiko ekoizle elkartuko dira Elexondo pasealekuan. Kale-animaziorik ez da faltako: 11:30ean kalejiran aterako dira Urduñako Bihotza Konpartsaren erraldoiak Amurrioko Txistuzaleak Elkartearen erritmora.
Eguneko plater nagusia Aiara Dantza Taldeak 12:30ean Juan Urrutia plazan eskainiko duen dantza emanaldia izango da. Horren ostean kalejira egingo dute herrian barrena eta parkean bazkalduko dute. Bazkalostea bingo musikatuarekin girotzearen ardura Dantza Lagunak kuadrillak izango du. Guk eskulturaren inguruan haurrei zuzendutako Kalaka jokoak egongo dira eta Txokogorri tabernan mus txapelketa egingo dute.
17:00etatik aurrera parkeko eszenatokia izango da jai-giroaren epizentroa. Patxi eta konpainiak dantzaldia eskainiko dute aurrena. Jarraian, Jonkass igoko da oholtzara, eta eguna bukatzeko Musutruk erromeriak ordu txikiak arte luzatuko du festa.
Aiara Dantza Taldeko kideek baserritarrez jantzita joateko deia luzatu dute. Kontzertuen ostean, gainera, 200 eurotan balioetsitako euskal jantzi bat zozkatuko dute.