Tubos Reunidoseko zuzendaritzak adierazi die langileei hartzekodunen konkurtsoa baino lehen metatutako lanorduak zorra bilakatzeko asmoa duela. Lanordu horiek dira, zehazki, urteko lanaldi kopurutik kanpo egindakoak.
Sindikatuek azaldu diote Aiaraldea Komunikabideari zuzendaritzak iradoki duela administrariaren erabakia dela, baina langileen antolakundeek zalantzak dituzte eta ekainaren 1ean Amurrion bertan egongo den bileran galdetuko diote horri buruz konkurtsoa kudeatzeko hautatutako enpresari berari.
Izan ere, zenbait sindikatuk ziurtatu dute neurri hori ezin dutela hartu, lan hitzarmen kolektiboan jasota baitago: "Lan hitzarmena ez da bertan behera geratzen hartzekodunen konkurtsoa abiatzeagatik".
Halaber, langile erakundeei ez zaie koherentea iruditzen konkurtsoa baino lehen sortutako aparteko lanordu horiek modu librean ezin baliatzea, lan hitzarmenak jasotzen duen moduan, eta hortik aurrera, aldiz, bai. "Ezberdintasun bakarra da lehen gure arduradunari jakinarazi behar geniola lanordu horiek hartuko genituela eta hemendik aurrera giza baliabideen atalari komunikatu behar diogula", erantsi dute sindikatuek.
Elkarretaratzea ekainaren 1ean
Bihar epaitegian egin behar zuten bilera bertan behera geratu denez, enpresa batzordeak ez du egun osoko lanuztea egingo. Dena den, ekainaren 1ean administraria Amurrioko lantegira bertaratuko denez, ogitartekoaren tartea erabiliko dute elkarretaratzea egiteko.