Luxuzko gonbidatuekin aurkeztu zuten iragan maiatzaren 28an Orbea Gravel Aiaraldea bizikleta martxa. Ekainaren 6an Amurrion ospatuko den kirol probak Orbea Gravel Rioja Alavesa edo Orbea Monegros proba entzutesuen lekukoa hartuko du, Arabako Txakolina ardatz.
Izaskun Bengoa eta Haimar Zubledia txirrindulari profesional ohiek egin zituzten ekimenaren enbaxadore lanak ostegunean Amurrioko Refor enpresaldean egindako aurkezpen ekitaldian. Probaren nondik norakoak zehaztu zituzten bertan.
Bi ibilbide proposatu dituzte antolatzaileek, eskualdeko natur-inguruneak bertatik bertara ezagutzeko. Ibilbide laburrak 57 kilometroko luzera izango du eta 1.400 metroko desnibela. Proba luzean izena eman duten kirolariek, ordea, 90 kilometroko ibilbidea osatu beharko dute, 2.100 metroko desnibelarekin.
"Orbea Gravel Aiaraldea aukera bat da gure lurraldea zikloturismoaren esparruan erreferentziazko helmuga gisa kokatzen jarraitzeko, kirola, jasangarritasuna eta kultura sustapena uztartzen dituen garapen eredu baten alde eginez. Horrelako ekimenek bisitariak erakartzeaz gain, jarduera ekonomikoa sortzen, tokiko nortasuna indartzen eta gure eskualdeak dinamizatzen laguntzen dute", adierazi zuen Ana del Val Kultura eta Kirol foru diputatuak ekitaldian.
Orbeak "premiun esperientzia" gisa definitu du hitzordua. Hori dela eta, dortsal kopuru mugatua jarri dute eskuragarri; 500 orotara. Abenduan ireki zuten izen-emate epea eta maiatzaren 25ean itxi zuten.
Ekainaren 6koa, ordea, ez da bizikleta martxa soil batera mugatuko. Aurreko egunean (ekainak 5) hasiko dituzte jarduerak Amurrioko erdigunean. Irekiera ekitaldi ofiziala eta dortsal banaketaz gain, herri kirol erakustaldia edota zuzeneko musika ere eskainiko dute. Larunbatean, gainera, , Putxeren Euskadiko egungo txapeldunak berak prestatutako eltzeko babarrunak dastatzeko aukera egongo da ere.