ESk sindikatuak oharra zabaldu du jakinarazteko Tubos Reunidoseko zuzendaritzak aldebakarrez erabaki duela Osasunaren Zaintza Zerbitzua kanporatzea eta Quirón enpresari ematea. Langile erakundeak erabateko desadostasuna adierazi du, lan hitzarmenak jasotzen duelako funtzio horiek taldeko langileek bete behar dituztela.
Antolakundeak azaldu du orain arte egondako bi medikuek konpainia utzi dutela eta hutsune hori aprobetxatu nahi duela zuzendaritzak kanpo enpresa baten bitartez egiteko: "Hitzarmenak etengabeko aipamena egiten dio Enpresako Zerbitzu Medikoari, Tubos Reunidosen barruko egitura propio eta integratu gisa. Bertako profesionalek Langileen Legezko Ordezkaritzarekin (LLO) koordinatutako barne-prozesuetan, lan-batzordeetan eta jardueretan parte hartu ohi dute".
Halaber, ESKren aburuz erabakiak Prebentzio Legea ere urratu du, prebentzio-ordezkariei kontsulta egin behar baitzaie aldez aurretik.
Hartzekodunen konkurtsoa
Sindikatuak erantsi du neurri hori langileek lortutako eskubideen kontrakoa dela eta frogatzen duela, nahiz eta hartzekodunen konkurtsoan egon, betiko zuzendaritza ari dela enpresaren erabakiak hartzen, esaten denaren kontrara. "Honek ez du Tubos Reunidosen egoera finantzarioa hobetzen, langileen eskubideak murriztea dakar soilik", nabarmendu du langile erankundeak.