Puntako artistez gozatzeko aukera egon da asteburu honetan Amurrion, Aiara Fest jaialdiaren bigarren edizioan. Ostiral zein larunbatean musika estilo anitzetako taldeak igo dira eremuan muntatutako eszenatoki bietara. Positiboki baloratu du antolakuntzak aurtengo edizioa "bai publikoaren harreragatik zein ekitaldiaren funtzionamendu orokorragatik".
Ostiralean Mirua talde tolosarrak estreinatu zuen oholtza eta haien atzetik etorri zen kontzertu zaparrada: Niña Coyote eta Chico Tornado, Sanjiguelas del Guadiana, Sobrezero, Su Ta Gar, Süne eta Biznaga taldeek astindu zuten Amurrio. Sr. Lobezno DJak itxi ditu festibalak irauten dituen bi egunak.
Larunbatean, ordea, Gwa Ya reggae talde aiaraldearrena izan zen egunari ekiteko ardura. Taldekideen hitzetan, "aukera oso handia izan da horrelako eszenatoki handi batean jotzea, azpiegitura profesionalarekin eta soinu-teknikari bikain batekin". Eman beharreko guztia oholtzan eskaini eta gero, musikaz beteriko arratsalde eta gauaz gozatzeko aukera heldu zitzaien haiei ere. El Jose, Janus Lester, Javi Medina, Dubioza Kolektiv, Merina Gris eta La Pegatinaren kantek girotu zuten arratsaldea zein gaua.
Jaialdia positiboki baloratu du antolakuntzak eta lehen ordutik apurka biltzen joan ziren entzuleen harrera nabarmendu izan du: "Arratsaldeko lehen zuzenekoetatik hasi eta goizaldeko azken uneetara arte, esparruak energia etengabea mantendu zuen, jaialdiaren erritmoa lagundu eta esperientziaren izaera kolektiboa indartu zuen publikoarekin".
Proposamen artistikoaren aniztasuna ere azpimarratu dute festibaleko antolatzaileek. Horren isla da, esaterako, hainbat familia hurbildu zirela kontzertuez gozatzera, "mundu musikal berri bat deskrubitzen ari ziren neska-mutilekin".
Gauzak hala, Euskal Herriko egutegi musikalean "bere presentzia indartzen jarraitzen duela" baieztatu dute Aiara Festeko arduradunek, bai eta "Amurrio berriz ere kultura biziaren, musikaren eta ospakizun partekatuaren topagune gisa" jarri duela mapan.
Argazkiak: Ainhoa Lauzirica (Aiara Fest) eta Txabi Alvarado