Egun osoko egitarau oparoa prestatu dute Baranbioko Administrazio Batzarreko kideek Ahuntz Eguna ospatzeko larunbat honetan. 8:30ean abiatuko da programa Aztarna elkartearekin eskutik, martxa etnografikoarekin, eta Colapso rock taldeak itxiko du, iluntzeko zortzietan eskainiko duen kontzertuarekin. Ekintza mordoa egongo dira bitartean.
Garrastatxun jarri dute lehenbiziko hitzordua. Bertatik abiatuko da Aztarna elkarteak prestatutako ibilaldi etnografikoa. Eguraldiaren iragarpenak baldintzatuko du ibilbidea, baina printzipioz, honako hau da asmoa: Pikaza baserritik irtetea eta bertako erletxea bisitatzea. Ostean, Katzabasora hurbiltzea eta Anbotoko anderearen eta ikazkinaren fenomenoa deskubritzea. Otegiren artzain txabola izango da hurrengo geltokia eta arbasoen ahuntz eta ardien artzaintzaz gehiago jakiteko parada egongo da. Nafarkorta ingurua ere bisitatzea da asmoa eta hamaiketakorako unea ere egongo da.
Bitartean, 9:00etan hasiko da abereen azoka eta XVII. Ahuntz lehiaketa. Herri kirol erronka abiatuko da 11:00etan eta meza ere egingo dute eguerdian. Trikitxa doinuek alaituko dute eguna 12:30etik aurrera, eta ahuntz haragia dastatzeko aukera egongo da.
Lehiaketaren sari banaketa 14:00etan izango da eta horren ostean bazkaria, 15:00etan. Bi kontzerturekin amaituko da eguna: Gauargi erromeriarena 17:00etan eta Colapso rock taldearena 20:00etan.