Komunikabideek argitaratu dutenez, Maria Teresa Trinidad epaileak, Tubos Reunidoseko administrazio konkurtsoaren ardura duenak, astelehenean agindu zuen multinazionala erosteko eskaintzak jasotzeko epea abiatzea. Trinidaden helburua da, antza, hilabete amaierarako zehaztea balizko eroslerik dagoen.
Sindikatuek azaldu dute eurek ez dutela inolako komunikaziorik jaso, baina aste honetan bildu direla administrari konkurtsalarekin.
Enpresa osotasunean bereganatzea, lehentasuna
PKF Attest administrari konkurtsalak ezarritako arauen artean zehazten da lehentasuna izango dutela Tubos Reunidos konpainia osorik erosi nahi dutenek. Horrek esan nahi du interesatuta egon behar direla Amurrio, Trapaga eta Langraitz Okan dauden azpiegituretan eta hirurek sortzen dituzten 1.300 lanpostuetan.
Sindikatuek berretsi dute PKF Attestekin aste honetan egin dutela bilera eta konpainiak irizpide horren berri eman ziela.
Dena ondo bidean, administrariak aukera izango luke abuztuan bertan hautatzeko zein inbertitzailek egin duen eskaintza onena.
Hurrengo fasea, egoera ezagutzea eta gero azken eskaintza
Behin interesdunak dauden edo ez jakinda, 30 eguneko epea irekiko dute balizko inbertitzaileek dokumentazio guztia aztertzeko, azpiegiturak bisitatzeko eta zuzendaritzarekin eta sindikatuekin elkartzeko.
Horren ostean, azken eskaintza ekonomikoa egin beharko dute eta administrariak erabakiko du zein onartuko duen, aldagai anitzak aintzat hartuta: diru kopurua, enplegua mantentzeko apustua, finantzazioa edota zorrak kitatzeko konpromisoa, besteak beste.
Asteazkenean izandako bileretan, sindikatuek azpimarratu zuten enpleguaren aldeko hautuak garrantzia izan behar duela eskaintza jasotzeko orduan.
Abuztuan erabaki bat
Dena ondo bidean, administrariak aukera izango luke abuztuan bertan hautatzeko zein inbertitzailek egin duen eskaintza onena.
Edonola ere, bestelako aukerak ere badaude, eta inork ez badu proposamenik egiten, edo ez bada ganorazkoa, Tubos Reunidos zatika saltzea izan daiteke administrariak har dezakeen beste bide bat.