Megatech enpresako langile batzordeak gaur zabaldu du ofizialki bi greba eguneko deialdia. Zehazki, 24 orduko lanuzteak egingo dituzte bihar, ekainaren 23an, eta ostegunean, hilaren 25ean. Sindikatuek bide hori hartu dute zuzendaritzarekin izandako azken bileraren ondoren, horrek ez baitu bere proposamena aldatu lan hitzarmen berriari begira.
Aipatu beharra dago agiri hori bost urtez egongo dela indarrean.
Desadostasun puntu nagusiak: inflazioa, errelebo kontratuak, lanaldiak...
Enpresa eta langileen arteko talka puntu nagusia soldata da. Izan ere, Megatechek egindako eskaintzarekin, beharginen aburuz, ez da bermatzen inflazioari aurre egitea. Alegia, konpainiak proposatu du KPI %1,5 baino txikiagoa izango balitz, %0,5 gehiago igotzea soldata. KPI %1,5 eta %2,5 artean egonez gero, aldiz, gehikuntza %0,25ekoa litzateke eta %2,5tik gora, azkenik, KPI bera edo %2,75.
Sindikatuek bidalitako komunikazioan salatu dute zuzendaritza ez dela prezioen igoeraz jabetzen.
Edonola ere, badaude bestelako aldarrikapenak, adibidez, errelebo kontratuaren aktibazioa. Enpresak gehienez hamahiru abiatu nahi ditu eta hirugarren taldeko langileei mugatu, gainera.
Beharginen antolakundeek aipatu dute kide ugari egongo direla bost urtetan neurri hori hartzeko adinean eta ez bakarrik hirugarren taldekoak.
Salatu dituzten beste puntu batzuk dira lanaldia gehiago murriztearen beharra —eta ez soilik bi egun bost urtetan— eta gauez lan egiteko plusa duintzea.
Oharrak
Mobilizazioen berri eman ez ezik, sindikatuek beharginei ohartarazi nahi izan diete. Izan ere, euren ustez, posta elektronikoko mezuen bitartez edo bestelako bitartekoekin "langileak kikiltzen eta zatitzen" saiatuko da enpresa.