Grebaren amaierak ez du lasaitasuna ekarri Tubos Reunidosera, inondik inora. Izan ere, multinazionalaren egoera tenperatura berotzen ari da epaitegietan eta bi fronte piztu dira azken orduetan.
Alde batetik, zenbait hedabide (El Confidencial edota Vocento taldea) saiatzen ari dira Leire Diez buru duen ustelkeria kasua EAJri lotzen. Horretarako, Guardia Zibilaren UCO unitateak egindako txostena ari dira baliatzen.
El Confidencial hedabidea eta Vocento taldea saiatzen ari dira EAJ lotzen Tubos Reunidoseko ustelkeria kasuarekin, nahiz eta UCOren txostenak ez duen adierazten alderdiak Leire Diezekin harremana duenik.
Hala ere, txostenak berak argi utzi du Andoni Ortuzarrek (Euskadi Buru Batzarreko presidentea zena garai horretan) eta Joseba Aurrekoetxea senatariak ez zutela inolako harremanik izan Leire Diezekin eta ez zutela inolako dirurik kobratu horren truke.
Berez, polemikaren iturburua da bi jeltzaleek bilera bat izan zutela 2025ean Carlos Lopez de las Heras Tubos Reunidoseko CEOarekin eta Vicente Fernandez SEPIko aurreko presidentearekin.
Jarduera politiko arrunta
EAJk, bere aldetik, ez du bilera hori egin izana ukatu eta azpimarratu du horrelako batzarrak erabat arruntak direla jarduera politikoan eta alderdia ezin dela alde batean geratu euskal enpresak arriskuan daudenean: "Enpresa horiek estrategikoak dira, haien azpian lanpostu zuzen asko daudelako, bai eta zeharkako lanpostuak ere, eta horiek guztiek inpaktu handia dute enpresak kokatuta dauden eskualdeetako ekonomian. Ondorioz, inpaktu horrek zuzen-zuzenean eragiten die herritar askoren ongizateari".
Berez, jeltzaleek gogoratu dute beste konpainia batzuen kasuetan (Talgo, BSH...) ere ekimenak bideratu dituztela enpresak babesteko: "2024an Espainiako gobernuari erreklamatu zion Balenciaga Ontziolak birfinantzatzeko plana onartzea. Bide beretik, Euskal Taldeak, aurtengo martxoan, Kongresuan eskatu zuen Tubos Reunidos enpresaren zorra berregituratzeko".
Are gehiago, alderdi jeltzalek erantsi du beste talde politiko batzuek ere berdina egiten dutela, EH Bildu, kasu.
Gauzak horrela, EAJk nabarmendu du horrek ez duela loturarik "hirugarren pertsonek egiten dutenarekin paraleloki". Izan ere, Guardia Zibilak Leire Diezi eta Vicente Fernandezi leporatzen die ehunka mila euro kobratzea Tubos Reunidosen alde egitearen truke.
ELA zuzendaritzaren kontra
UCOren txostenak ikusgarritasun gehiena izan duen arren, ELAk benetako ibilbide judiziala abiatu du epaitegietan, alegazioak aurkeztu baititu Konkurtso Administrazioaren aurrean, kaudimengabezia urteetako kudeaketa txarraren ondorio dela salatuta.
Horregatik zuzendarientzat ondasunen enbargoak, inhabilitazioak eta erantzukizun ekonomikoak eskatu ditu sindikatuak.
Zuzendaritzarentzat ondasunen enbargoak, inhabilitazioak eta erantzukizun ekonomikoak eskatu ditu ELA sindikatuak.
Zehazki, ELAk eskatu dio Konkurtso Administrazioari Tubos Reunidosen hartzekodunen konkurtsoa erruduntzat jo dadila eta enpresako zuzendaritzaren zein Administrazio Kontseiluaren erantzukizunak argitu daitezela.
Sindikatuak azaldu du 2008an kokatzen duela Tubos Reunidosen egungo kaudimengabezia egoeraren jatorria. Urte hartan, enpresak 170 milioi euroko zorra hartu zuen bere akziodunak ordaintzeko: "Baliabide horiek ez ziren ez industria modernizaziora ez negozioaren hazkundera bideratu, horrenbestez, sortutako zorpetzea urte luzez konpainiaren gain egiturazko oztopo bihurtu da".
Halaber, ELAren iritziz, han hasi zen arazoa, eta ez SEPIri eskatutako maileguan. Horrez gain, langile erakundeak gogoratu du mailegu kreditu horri lotutako ikerketak egiten ari direla Auzitegi Nazionalean.
Azkenik, ELAk azpimarratu du langileak ezin direla egoera honen ondorioen erantzule egin, urteetako kudeaketa negargarriaren emaitza baita: "Konkurtsoaren erantzukizuna enpresako zuzendaritzak, Administrazio Kontseiluak eta akziodunek hartu dituzten erabakiei dagokie soilik, akziodunen mesedea lehenetsi baitute konpainiaren etorkizuneko bideragarritasunaren kaltetan".