“LGTBIQA+ harrotasuna ez da hiri handietako kontu bat soilik, herri txikietan ere bagara kolektiboko kideak eta harro gaude”. Aldarri hori zabaltzeko sortu zen Amurrio Harro elkartea duela bost urte. Hainbat jarduera antolatu ditu taldeak bere ibilbidean zehar, baina bereziki bat geratu da urteroko egutegian markatuta, ekainaren 28aren bueltan antolatutako harrotasunaren eguna, alegia.
Aurten, larunbat honetan, ekainaren 27an, antolatu dute aldarrikapena eta jaia batzen dituen egun handia eta goizetik arratsaldera arte luzatuko den egitaraua prestatu dute. Herritarrei luzatu diete parte hartzeko deia, errespetuz jokatzea baldintza bakarra.
Egitarau oparo eta anitza
Goizean goiz abiatuko dira, kirolari ere lekua eginez: Gorobel kirolgunearen eskutik social run-a egingo dute, eta hamaiketakoa egingo dute ostean. Behin indarrak hartuta, nork bere tote bag pertsonalizatua sortzeko aukera izango du. Ekintza nagusiak Juan Urrutia plazan egingo dituzte, eta euria eginez gero, San Antonera lekualdatuko dira.
Eguerdian egingo diote tarterik handiena aldarrikapenari, elkarretaratzearekin. Hilabetean zehar apainduta egon diren taberna eta komertzioetako erakusleiho lehiaketako sari banaketa egingo dute gero, bertako produktuen saskiaren zozketarekin batera.
Horren ostean, kalejira abiatuko dute Amurrioko kaleetan barrena, Beti Jai Fanfarrearen jai-doinuez lagunduta. Aurtengo apustuetako bat musika emanaldiak herritik zabaltzea izan dela azaldu dute elkarteko taldeek, horrela ikusgarritasuna emateko ekimenari eta ez dezaten ikusi “soilik plazatik igarotzen diren horiek”.
15:00etan egingo dute herri bazkaria eta Bika taldeak kontzertua eskainiko du bazkalostea luzatzeko. Las Fellini trabestiak itzuliko dira Amurriora eta ikuskizuna egingo dute 17:15ean. Jony DJa kalerik kale ibiliko da amurrioarrak dantzan jartzeko eta horrela itxiko dute eguna.
Behin larunbata igarota, Amurrio Harro elkartearen jarduna ez da etengo, hitzaldiak zein tailerrak antolatzen edota LGTBIQA+ kolektiboari buruzko informazioa, materiala eta aholkularitza eskaintzen jarraituko du, eskualde anitz eta askeago baten alde lanean.