Amurrioko herritar bat Aiaraldea Komunikabidearekin harremanetan jarri da udako igerilekuei lotutako auzi bat salatzeko. Bizilagunak azaldu duenez, guraso bakarreko familiak ezin dute familiei bideratutako abonua eskuratu, nahiz eta Eusko Jaurlaritzako irizpideek hala gomendatzen duten.
Hain zuzen, Ongizate, Gazteria eta Erronka Demografikoaren Sailak iragan abenduaren 2an plazaratu zuen guraso bakarreko familien araubidea ezartzen duen dekretua. Bertan zehazten da guraso bakarreko familiek babes berezia behar dutela, “bereziki zaurgarriak” direlako. “Familia mota horrek pobrezia-arrisku handiagoa du, familia eta lana uztartzeko zailtasun gehien sufritzen ditu, eta bera egoten da sarrien gizartean baztertuta” dio testuak.
Amurrioko herritarrak duela hiru urte egin zuen eskaera formala Amurrioko Udalean, baina salatu du ez duela oraindik erantzun ofizialik jaso, eta dio horregatik erabaki duela gaia publiko egitea.
Udalaren erantzuna
Aiaraldea Komunikabidea Amurrioko Udalarekin jarri da harremanetan gaiari buruz galdetzeko eta honek erantzun dio gai hori “kirol-instalazioei lotutako udal-tasen hurrengo berrikuspenean aztertuko dela”.
Tokiko erakundeak azaldu du lanean ari dela udal igerilekuetako eta kiroldegiko zerbitzuak “kudeaketa-kontratu bakarrean” bateratzeko, eta prozesu horri esker “tasak eta abonu-modalitateak berrikusi eta eguneratu” ahalko direla, “egungo gizarte-errealitatera egokitzeko eta dauden familia-ereduei modu egokiagoan erantzuten dietela bermatzeko”.
Gauzak hala, guraso bakarreko familien errealitatea kontuan izango dutela ziurtatu du Udalak, “kirol-instalazioetara sartzeko tarifak eta baldintzak berrikusteko prozesuan”.
Horri lotuta, tokiko erakundeak adierazi du horrelako ekarpenak “eskertzen” dituela, “zerbitzu publikoak hobetzen eta udalerriaren benetako beharretara egokitzen laguntzen dutelako”.