Amurrioko Tipi-Tapa Haurreskolako guraso eta tutore legalek sinadura bilketa abiatu dute hemen. Izan ere, salatu dutenez, azken asteetako muturreko beroak 32° tenperaturak utzi ditu zentroan.
Gurasoek azpimarratu dute egoera horrek eraman dituela hezitzaileak 0 eta 2 urte bitarteko umeak etengabe hidratatzera, bero kolpeen beldur.
Adingabeen arduradunek adierazi dute lana eta familia kontziliatzeak ezin duela ekarri umeen osasuna arriskuan jartzea.
Eskaera
Gurasoek kexa kolektiboa aurkeztu diete Amurrioko Udalari eta Haurreskolen Partzuergoari eta aldarrikatu dute ezinbestekoa dela Tipi-Tapan dauden hiru espazioetan klimatizazio gailuak egotea.
Izan ere, Udalak aire girotuko makina eramangarriaz hornitu du haurreskola, baina gurasoek ez dute uste hori nahikoa denik.
Gauzak horrela, euren eskaerak honako hauek dira:
- Pertsianak lehenbailehen konpontzea, isolamendu termikoko funtzioa berehala bete dezaten.
- Kristalak eta zentroko leihoak berritzea, isolamendu termiko duina eta segurua bermatzeko, etorkizuneko bero-boladei begira.
Halaber, Tipi-Tapako familia erabiltzaileek honakoa aipatu dute: "Administrazioari gogorarazten diogu haurrak babestu behar dituela eta ikastetxeetan osasun eta segurtasun araudia bete behar duela".
Arazoa Eusko Jaurlaritzaren teilatuan
Egoera hori, edonola ere, ez da soilik Amurrion jazo. Izan ere, maiatzean Bilboko zenbait ikastetxe publiko mobilizatu ziren ikasle batzuk ospitaleratu behar izan zituztelako bero kolpeen ondorioz.
Hori dela eta, Begoña Pedrosa Hezkuntza Sailburuak iragarri zuen erosotasun termikorako plana garatzen ari direla eta lau ikastetxetan hasiko dutela programa pilotua.