Nola sentitzen zara zure kuadrillako ordezkaria izateagatik?
Oso pozik eta harro. Euskotarrak bezalako historia duen kuadrilla bat ordezkatzea ohore handia da niretzat. Azkenean, aurtengo ordezkaria ni naiz, baina atzean kuadrilla oso bat dago, urte osoan lanean, jaiak ilusioz prestatzen dituena.
Noiz eta nola hasi zinen zure kuadrillako kide izaten?
Txikitatik bizi izan ditut kuadrillaren ohiturak eta jaiak. Hala ere, azken urteotan hasi naiz modu aktiboagoan parte hartzen, kuadrillako egunerokoan eta antolatzen diren ekintzetan inplikatuz.
Zerk egiten du berezi zure kuadrilla?
Gure kasuan, Euskotarrak 61 urteko historia duen kuadrilla da. Urte hauetan zehar tradizioa, laguntasuna eta jaietarako ilusioa mantentzen jakin dugu. Belaunaldi ezberdinak elkartzen dituen kuadrilla izatea da, zalantzarik gabe, berezi egiten gaituen gauzetako bat.
Zein da jaietako zure ekintzarik gustukoena?
Argi daukat: karrozak. Uste dut gurdiak direla Amurrioko jaiak beste herrietako jaietatik benetan bereizten dituena. Oso berezia da bizilagunen artean, muxutruk eta denon artean, herriak gozatu dezan sortzen dugun guztia. Gainera, guretzat ez da egun bateko kontua bakarrik. Gurdiak prestatzea urte osoan zehar elkartzeko aitzakia izaten da. Desfileko eguna lan guzti horren amaiera ederra da, baina benetako balioa bidean bizitzen dugun guztian dago.
Karrozen lehiaketa irabaziko duzuela uste duzue?
Irabazteak beti sortzen du ilusioa baina badakigu urtero maila handia dagoela eta kuadrilla guztiek lan ikaragarria egiten dutela. Azken urteotan gure karrozen bidez munduan barrena bidaiatu dugu; aurten, ordea, etxera itzultzea erabaki dugu. Horregatik, San Ferminak aukeratu ditugu. Irabazten badugu, oso pozik hartuko dugu, baina, batez ere, jendeak gure lana gustuko izatea eta karrozarekin disfrutatzea nahiko genuke.
Egiteari utziko balitz, jaietako zein ekintza botako zenukeen gehiago faltan?
Kuadrillen bazkari herrikoia botako nuke gehien faltan. Belaunaldi ezberdinak elkartzen gara bertan eta hori oso berezia da.
Amurrioko jaiak esaldi labur batean deskribatu beharko bazenitu?
Amurrioko jaiak tradizioa, kuadrillak eta belaunaldiz belaunaldi mantentzen den lana eta ilusioa dira.