Nola sentitzen zara jaietako ordezkaria izateagatik?
Poz handiarekin eta harrotasunez sentitzen naiz. Bizitzan behin gertatzen den zerbait da eta aurten gainera kuadrillaren 60. urteurrena izanda ardura handia dudala ere sentitzen dut.
Noiz eta nola hasi zinen zure kuadrillako kide izaten?
Txikitatik Dantza Lagunak kuadrillaren parte izan naiz. Gurasoak eta familia betidanik izan dira kuadrillaren parte eta txikitatik kuadrillako jantziarekin hazi naiz.
Zerk egiten du berezi zure kuadrilla?
Urteak pasa ahala festa giroa sortzen jarraitzen dugula. Urtez urte, belaunaldiz belaunaldi Dantza Lagunak kuadrilla bizirik jarraitzen duela eta horrela jarraituko duela.
Zein da jaietako zure ekintzarik gustukoena?
Gehien gustatzen zaidan ekintza Txupinazoa dela esango nuke. Hala ere, beste ekintza polit eta dibertigarri asko ere izaten dira, hala nola kontzertuak edo karrozen eguna. Baina, txupinazoa bereziki hunkigarria eta berezia izango da aurten niretzat.
Karrozen lehiaketa irabaziko duzuela uste duzue?
Bai noski, gainera aurten 60. urteurrena izanda topera goaz. Moulin Rouge egitea erabaki dugu. Izan ere, 2012.urtean gai hori aukeratu genuenean, karroza batzuk erre egin ziren eta lehiaketa bertan behera geratu zen. Horregatik, aurten berriro gai berdina aukeratzea erabaki dugu, omenaldi gisa.
Egiteari utziko balitz, jaietako zein ekintza botako zenukeen gehiago faltan?
Karrozen eguna izango litzateke faltan botako nukeen ekintza. Ez da egun horretan gertatzen diren gauza guztietatik, baizik eta atzean dagoen lanagatik eta karrozak prestatzen diren bitartean bizitzen diren momentu guztiengatik ere. Oso berezia da.
Amurrioko jaiak esaldi labur batean deskribatu beharko bazenitu?
Amurrioko jaiak herria elkartzen duen ospakizun berezia dira.