Amurrioko jaiek iraun bitartean, indarkeria matxistaren aurkako erreferentziazko gune bilakatuko da Elexondo pasealekuko kiosko zaharra. Bertan kokatuko da Puntu Morea, indarkeria matxistei aurre egiteko informazio eta sentsibilizazio gunea.
Abuztuaren 12tik 16ra egongo da zabalik arreta gunea eta, horretaz gain, beste bi dinamizatzaile Amurrioko kaleetan barrena ibiliko dira. Honako hau izango da Puntu Morearen ordutegia egunez egun:
- Abuztuak 12: 19:00-22:00
- Abuztuak 13: 19:00-22:00
- Abuztuak 14: 21:00-00:00
- Abuztuak 15: 19:00-22:00
- Abuztuak 16: 19:00-22:00
“Puntu Morea informazio-puntu bat baino askoz gehiago da; Amurriok indarkeria matxistarik gabeko jaiekin duen konpromisoa ikusarazteko tresna da, eta herritarrei indarkeria matxistak prebenitzeko eta edozein egoeraren aurrean nora jo erakusteko dauden baliabideak hurbiltzeko tresna”, adierazi du Ixone Saratxaga Amurrioko Udaleko berdintasun zinegotziak.
Eider Garcia Gomezen horma-irudia
Kiosko zaharrean esku-hartze artistikoa egin dute ere, "udalerriak espazio publikoan berdintasunarekin eta indarkeria matxisten prebentzioarekin duen konpromisoa ikusarazteko" Udaletik azaldu dutenez. Kioskoaren hormak estaltzen dituen diseinua Eider Garcia Gomez ilustratzaile amurrioarraren lana izan da.