Saratxoko Administrazio Batzarrak ekintza bikoitza deitu zuen larunbat arratsaldean lego-harriaren kokapen berria azaltzeko eta Josean eta Miguel Angel Gutieerez anaiak omentzeko.
Horretarako hiru ardatzen inguruan antolatutako ekitaldia prestatu zuten. Lehenik eta behin, Aztarna elkarteko Jesus Mari Garaioren laguntzaz lego-harriaren historia argitu zuten, Pancorvo eta Bilbo arteko bidean jarri zutena duela mendeak.
Gero Josean eta Miguel Angel Gutierrez anaien omenaldia heldu zen. Zaloa Kintana eta Cosme Ibarrolak oroitzapenei hitza jarri zieten eta tarteka hiru abesti jo zituzten gonbidatutako Saratxoko abeslari eta musikari bana. Zehazki, Todo cambia Mercedes Sosaren kanta, ETSren Zurekin batera eta Ikusi mendizaleak entzun ziren.
Sonia Gutierrez Joseanen alaba ere mintzatu zen eta bertaratutakoak hunkitu zituen.
Azkenik, alaitasunerako unea ere eskaini zuten. Hain zuzen, mokadua atera zuten guztientzat eta umeentzat puzgarriak egon ziren. Azken txanpa horretan besarkada eta topaketa mordoa egon zen, aspaldi elkar ikusten ez zen jendearen artean. Horrela sortu ziren iraganari buruzko elkarrizketak, baita etorkizuneko proiektuen inguruan ere.
Argazkiak: Jose Mari Gutierrez