Sortuk zabaldu du Txiki eta Otaegi militante independentisten fusilamenduen 51. urteurrena gogoratuko duela igandean, irailaren 27an, Amurrioko San Anton plazan. Eskualdeko izaera dauka deialdiak eta Euskal Herri osoan 50 ekitaldi guztira antolatu ditu alderdiak, Loturak askatzera! lemapean.
Sortuk azpimarratu du efemeridea oroimen historikoa lantzeko baliatuko dutela, baina oraina oso presente egongo dela: "Euskal Herrian potentzial politiko izugarria daukan fase politikoa zabaltzea lortu dugu. Eta orain askapen prozesuan egoera berrietan murgiltzeko baldintzak ereitea dagokigu".
Talde politikoaren aburuz, irailaren 27a Nazio Askapenaren egunaren izaera hartzen ari da eta iragana eta etorkizuna lotzeko balio behar du: "Txiki eta Otaegiren fusilamenduen urteurrena hainbat kide eta belaunaldi elkartzen dituen eguna da Sorturentzat. Euskal Herriaren alde borrokan ari zen, ari den eta haren askatasuna lortu arte borrokan ariko den komunitatea izateak batzen gaitu irailaren 27an. Nazio askapen mugimendua zerbait bada borroka komunitate bat delako".