Amurrio Aisia Eskaut Taldeak 50 urte beteko ditu datorren urtean, eta dagoeneko hasi dira urteurrenerako motorrak berotzen. 2027ko udaberrira arte luzatuko diren jardueren segidaren lehenengo mugarria jarriko dute datorren urriaren 10ean.
Hain zuzen, talde amurrioarrak Aspaltza mendira irteera egingo du, bertan kokatuta dagoen Felix Murga Eskaut Taldearen fundatzailearen oroimenezko plaka bisitatzeko.
Ibilaldia 9:00etan abiatuko da, San Roketik. Modu batean edo bestean Eskaut Taldearen parte izan diren pertsona guztiak gonbidatu dituzte hitzordura: gurasoak, begirale ohiak, senideak, lagunak...
Mende erdiko historia
1977ko ekainean sortu zuten Amurrioko Aisia Eskaut Taldea. Felix Murga apaiz eta etnografo ezaguna izan zen ekimenaren bultzatzaile nagusia. Oso denbora laburrean garapen handia izan zuen taldeak: 24 gazte eta 8 begiralerekin ekin zioten ibilbideari eta handik bi urtera 414 kidek osatzen zuten taldea.
Mende erdian makina bat jarduera antolatu dituzte: kanpaldiak, txangoak, boluntario lanak... Eta oraindik ere bizi-bizi dago Aisia Eskaut Taldea.