Acha Destilategiak enpresak efemeride bikoitza dauka aurten. Izan ere, 140 urte beteko dira 1886ko urriaren 3an Amurrioko lantegia ireki zutenetik. Horrez gain, duela 20 urte museoa inauguratu zuten udalerrian, ondare historikoa eta elaborazioen bilakaera gorde eta ezagutarazteko sortutakoa.
Hori dela eta, likore enpresak 10:00etatik 14:00etara irekiko ditu instalazioak. Sarrera librea izango da. Hau da, ez da aldez aurretik erreserbarik egin beharko eta bertaratzen direnek goiz osoan bisitatu ahal izango dituzte irekitako eremuak.
Horrez gain, 11:00etatik 12:00etara bisita historiko berezia eskaniko dute. Bertan, destilategiaren jatorria, Amurriora iritsi zeneko historia, fabrikaren bilakaera eta belaunaldiz belaunaldi gordetako ondarea ezagutzeko aukera egongo da.
Alanbikeen gunean, gainera, tokiko produktuen azoka txiki bat egingo da, Aiaraldeko ekoizleen parte-hartzearekin. Jardunaldian publikoak eskualdeko hainbat produktu ezagutu, dastatu eta erosi ahal izango ditu, ekoizle bakoitzaren proposamenaren arabera.
Eguna borobiltzeko, Achak iragarri du egitarauak bi sorpresa ere izango dituela, eta ekitaldian bertan emango direla ezagutzera.