Egun bizia izan dute gaur San Anton Armuru nagusien egoitzan. Izan ere, 11:30ean Ramiro Gonzalez Ahaldun Nagusiak, Cristina González lehenengo diputatu nagusiorde eta Enplegu, Merkataritza, Turismo eta Foru Administrazioko foru diputatuak, Gorka Urtaran Gizarte Politiken Saileko foru diputatuak eta Txerra Molinuevo Amurrioko alkateak bisita egin dute egikaritutako obren nondik norakoak ezagutzeko.
Zentroko zuzendariaren azalpenak izan dituzte gauzatutako hobekuntzak ikusteko eta komunetan, logeletan, eraiki den terraza berrian, egongelan, botikak gordetzeko gelan edota energiaren esparruan egindako esku-hartzeen lekuko izan dira.
1,3 milioi euro
Guztira, 1,3 milioi euroko inbertsioa egin dute eta Arabako Foru Aldundiak Europar Batasunaren Next Generation EU funtsen finantzaketa izan du, Suspertze, Transformazio eta Erresilientzia Planaren esparruan
Proiektuak eraikineko beheko solairua eraldatu du bereziki, 300 metro koadro ingurutan handitu baitute. Horri esker, egongela-jangelak azalera nabarmen handiagoa du orain eta askoz argitsuagoa da.
Gainera, aretoak berrantolatzeari esker, zenbait arreta zerbitzu lekualdatu ahal izan dituzte eremu horretara, hala nola ile apaindegia, podologia, errehabilitazioa eta farmazia.
Gehien baloratuko duten berritasunetako bat da bisita gela berria. Sarrera nagusiaren ondoan dago. Espazio horrek ingurune erosoagoa eskaintzen du egoiliarren eta senideen arteko topaketetarako.
Horrez gain, terraza berria sortu dute lehen solairuan, bertatik ibiltzeko modukoa. Esku hartzearen beste alderdi nabarmen bat irisgarritasuna hobetzea izan da, igogailu berria jarri baitute.
Energia eraginkortasunean ere hobekuntzak egin dituzte eta plaka fotovoltaikoen bidez kontsumitzen den elektrizitate erdia sortzen dute.
Hitzartze anitzak
Behin bisita amaituta eta Arloteek Txoriak txori abestu ostean, egongela betetzen zutenen aurrean -egoitzako erabiltzaileak, langileak, familiak...- hartu dute hitza.
Lehenengoa egoitzaren zuzendaria izan da eta jarraian Izaskun Bergara langilea, Amurrioko alkatea eta Ramiro Gonzalez Ahaldun nagusia hurbildu dira mikrofonora. Nola ez, guztiek izan dituzte esker hitzak erakundeentzat, egindako lanagatik eta erabiltzaile zein langileentzat, erakutsitako pazientziagatik.
Hitzartze bitxiena Juanjo Moraza erabiltzailearena izan da. Izan ere, bi ezusteko atsegin utzi dizkio inbertsioak. Alde batetik, egin zela, ez zuena argi gertatuko zenik, eta bestetik, iragarritako epeen barruan egin zutela. Zuzendariari eman dizkio eskerrak Morazak, lanen atzean egon baita etengabe.