Neurri handienean dator Gorobel Ibilaldiaren aurtengo edizioa. Amurrioko Mendi Lagunak Taldeak antolaturiko martxak 40 edizioetako langa gaindituko du datorren azaroaren 1ean, eta edizio borobila ospatzeko ibilbide berezia prestatu dute.
XL tamainako martxa
Ohikoan bezala hiru ibilbide prestatu dituzte adin eta maila guztietako mendizaleak elkartzeko asmoz. Ibilbide nagusiak 60 kilometroko luzera izango du eta alderik alde zeharkatuko du Gorobel mendilerroa. Bidean mendilerroa osatzen duten gailur guztiak zapalduko dituzte, Txarlazotik Aro mendiraino. Hori gutxi ez eta mendizaleek birritan igo beharko dute mendilerroa; Urduñako portutik aurrena eta Bedarbideko bidetik gerora. Goizale aterpean atseden hartuta Senda Negra bidetik egin beharko dute itzulera bidea Amurriora, guztira 3.000 metroko desnibel positiboa pilatuz.
Bestelako neurrien bila dauden mendizaleek ere izango dute nola gozatu azaroaren 1eko hitzorduan. Ibilbide ertainak 27 kilometroko zirkuitua osatuko du, Amurriotik Tologorrira eta buelta. Azkenik Ibilbide txikiak Babio mendira igoko ditu mendizaleak.
Izen ematea urriaren 16ra arte
Dagoeneko zabalik dago XL. Gorobel Ibilaldian izena emateko epea. Urriaren 16an egongo da hori egiteko aukera, Internet bidez. Izen ematearekin batera kamiseta teknikoa emango dute oroigarri gisa. Mendiko Lagunak Taldetik jakinarazi dutenez, honezkero 700 lagun baino gehiagok eman dute izena.
