Arabako Foru Aldundiak tasa turistikoa garatzeko derrigortasuna ezarri zuen ekainean eta dagoeneko Amurrioko Udalak bete ditu etxeko lanak, arauaren hasierako onarpena eginda, hurrengo urteko urtarrilean indarrean egoteko.
Hain zuzen, iraileko udalbatzan onartu zuen tokiko erakundeak nolako baldintzak izango dituen zergak. Berez, talde politikoek adostu dute ahalik eta tarifa txikienak kobratzea egunka, turismoa ez oztopatzeko:
- 4,5 euro bost izarreko hotelentzat.
- 3,5 euro lau izarrekoentzat.
- 1,5 euro hiru izarrekoentzat.
- Euro bat bi izarrekoentzat.
- 0,75 euro izar bakarrekoentzat eta pentsioentzat.
- Apartamentuentzat 1,5 euro.
- Camping eta landetxeentzat 0,75 euro.
- Agroturismoentzat 0,5 euro
- Etxebizitza turistikoentzat 4,5 euro, bai etxe osoa zein logelaka alokatzean.
Salbuespenak
Halaber, araudiak zenbait salbuespen aurreikusi ditu tasak ez kobratzeko: adingabeen, menpekotasuna duten pertsonen edota programa berezietan edo ikerketa batean parte hartzen dutenen edota indarrezko arrazoiengatik edota osasunagatik Amurriora joan direnen kasuetan.
Horrez gain, sei egunez baino ez dituzte kobratuko tarifak, egonaldi luzeak ez zigortzeko.
Negozioen jabeek ordaindu beharko diote Udalari hiruhilean behin, likidazioa eginda.
Nahiz eta aldeko boza eman, EH Bilduk aipatu zuen etxebizitza turistiko tasa langara igo behar dela progresiboki (6,5 eurora). Izan ere, etxebizitzaren arazoak Amurrion bestelako erroak izan arren, mezu politikoa zabaldu daiteke horrela, oposizioko taldearen aburuz.
David Romero zinegotzi sozialistak erantzun zuen zegokion batzordean egin behar zutela ekarpena, neurriak hartzeko tartea izateko.