Pasa den astean Elgoibarren aurkeztu zuten Euskadiko Krossak marka. Izen horrek barne hartzen ditu Euskal Herrian dauden lau nazioarteko kros lasterketak. Guztiak emititzen dituzte EITBn baina, ikusgarritasuna indartzeko, egitasmo berean batu dira.
Horrela, Zornotzako Krosak (igandean jokatuko dena), Donostia-Lasartekoak (azaroaren 1ean), Amurriokoak (abenduaren 27an) eta Elgoibarkoak (urtarrilaren 17an) egitasmo bateratuan aurkeztu dituzte euren proposamenak.
Amurrioko lasterketako antolatzaileek eurek aitortu dutenez, helburua argia da: elkarrekin indarra hartzea, Euskal Herriko kros atletismoa indartzea eta, azken batean, errotutako proba hauek etorkizunera begira sendotzea.
Oinkariak sustapen lanetan
Beste lasterketa batzuekin indarrak batu ez ezik, Oinkariak taldea, Amurrioko Nazioarteko Krosaren antolatzailea, badabil bestelako ekintzak prestatzen ere, atleten eta ikusleen interesa pizteko.
Esaterako, Internet bidezko solasaldiak egin dituzte goi mailako lehiaketa horretan aritzen diren kirolariekin eta publikoak ere galderak egin ditzake. Momentuz, Ruben Alvarez, Jimena Blanco, Katherine Tisalema eta Majida Maayouf izan dira elkarrizketatuak; eta, horrez gain, Telegram taldea sortu dute informazio zabaltzeko.