Amurrioko Aimara antzerki taldeak Antzerki Amateurreko XV. jardunaldia antolatu du aurten, eta umorea izango da edizio honetako ardatz nagusia. Egitarauak bi hitzordu izango ditu Amurrio Antzokian: urriaren 24an, Basauriko 7 Grados taldearen La Risa emanaldia izango da, eta urriaren 31n Getxoko Intxartu antzerki taldearena. Bi emanaldiak 20:00etan hasiko dira, eta sarrerek sei euro balioko dute.
Lehenengo hitzorduan, urriaren 24an, Basauriko 7 Grados taldeak hartuko du Amurrio Antzokiko agertokia. Itziar Lazkanok zuzendutako eta Felipe Lozak idatzitako lana aurkeztuko dute.
Egitarauak bi hitzordu izango ditu Amurrio Antzokian: urriaren 24an, Basauriko Compañia 7 Grados taldeaen emanaldia eta Getxoko Intxartu antzerki-taldearena.
La risa bost aktore protagonista dituen antzezlanak, komedia, erritmoa, abestiak eta zuzeneko musika uztartzen ditu, ikusleen artean barre-algara kolektiboa sortzeko helburuarekin. Guztira, hamalau istorio labur biltzen ditu, barregarri geratzeko beldurrari aurre egiten dioten eta eguneroko zentzugabekerien artean duintasuna bilatzen dutenak. Haien bizitzaz barre egitean, gure buruaz barre egitea bilatzen dute ere, pertsona orok bizi dituen egoerak azaltzen direlako.
Bigarren emanaldia urriaren 31n izango da, Getxoko Itxartu antzerki taldearen eskutik. Ivan Iparragirrek zuzendutako eta egokitutako La boda de la hija del presidente antzezlana taularatuko dute, Juan Mayorga eta Juan Cavestany idazleek sortutako Alejandro y Ana: lo que España no pudo ver del banquete de la boda de la hija del presidente obran oinarritua.
Umorea eta satira erabiliz, botere politikoaren zirrikituak azaleratzen ditu lanak. Gobernuko presidentearen alabaren ezkontzarako prestaketak abiapuntu hartuta, ekitaldi pribatu bat estatuaren funtzionamenduaren metafora bihurtzen du. Ezkongaiek zuzenean izendatu gabeko pertsonaia politikoen galeria batekin jarduten dute. Testuak ironiaz desmuntatzen du boterearen irudi publikoa, bere alderik zentzugabeena, autoritarioena eta surrealistena azaleratuz.
25 urte baino gehiagoko ibilbidea
Amurrion sortutako Aimara antzerki taldeak 1996tik dihardu eszenatokietan, eta 25 urte baino gehiagoko ibilbidean 32 lan baino gehiago aurkeztu ditu. Taldearen jatorria emakumez osatutako Aurreraka Taldean dago, 1999an, ordea, bide independentea hartu zuen, eta antzerki-talde misto bihurtu zen.
Hainbat lan taularatu dituzte azken urteotan, eta horietako batzuek kritikarien aitortza eta sariak jaso dituzte antzerki amateurraren lehiaketetan. Nabarmentzekoak dira, besteak beste, No hay ladrón que por bien no venga, La revolución, El enfermo Imaginario eta El Público de Lorca. Horrez gain, antzerki laburreko lanak eta sorkuntza propioko proiektuak ere lantzen dituzte.
Aimarak antolatutako XV. Antzerki Amateurreko Jardunaldiek, beraz, umorearen bidez antzerkiaz gozatzeko aukera eskainiko dute beste behin Amurrion. Bi emanaldietarako sarrerak sei euroan daude salgai Amurrio Antzokiaren webgunean.