Hainbat garai eta modelotako 60 Porschek Bizkaiko eta Arabako errepideak zeharkatu zituzten urriaren 24an, larunbatean, Drive&Rhythm topaketaren lehen edizioan. Ekimenak Alemaniako markaren jabeak eta zaleak bildu zituen, automobilgintza, musika eta elkartasuna uztartzeko asmoz.
Drive&Rhythm automobilen zaletasunatik abiatu zuten, autoen inguruan hainbat jarduera antolatzeko eta zaletasun bera duten pertsonak elkartzeko ekimen gisa.
Topaketak 60 Porsche batu zituen, hainbat modelo era garaikoak.
Lehen topaketa horretan, hainbat modelo eta garaitako ibilgailuak biltzea ez ezik, parte-hartzaileen artean esperientziak eta interesak partekatzea ere izan da helburu nagusia.
Aiaraldeko antolatzailearen arabera, Porsche markak lotura berezia sortzen du haren zaleen artean: “Porsche ez da beste marka batzuk bezalakoa. Porschea maite dutenek autoak maite dituzte, haien diseinua, historia eta abar. Horregatik, komunitate horretan gaian oso adituak diren pertsonak daude, benetako frikiak”.
"Komunitate horretan gaian oso adituak diren pertsonak daude, benetako frikiak"
Topaketa Berrizko MEGA instalazioetan hasi zen, ongi etorri gosari batekin. Ondoren, parte-hartzaileek ibilbideari ekin zioten, hainbat leku esanguratsu zeharkatuz, tartean Urkiola eta Arratia. Horrela, autoen inguruko zaletasuna partekatzeko aukera izateaz gain, Bizkaiko eta Arabako paisaiak eta errepideak ezagutzeko aukera ere izan zuten bertaratutakoek.
Ibilbidearen helmuga Kexaako Arcos de Quejana hotela izan zen, eta bertan egin ziren eguneko jarduera nagusiak. Bazkariaz gain, parte-hartzaileek kopa bat hartzeko, zuzeneko musika entzuteko eta DJ saioaz gozatzeko aukera izan zuten. Horrez gain, hainbat zozketa ere egin zituzten, topaketaren jai-giroa osatzeko.
Horrela, automobilgintza eta paisaia uztartzeaz gain, topaketak giro atseginean elkartzeko eta zaletasun bera partekatzen duten pertsonen arteko harremanak sendotzeko balio izan zuen.
Automobilgintza eta elkartasuna
Aisialdiaz eta automobilgintzaz harago, Drive&Rhythm topaketak helburu solidarioa ere izan zuen. Ekimenaren bidez lortutako irabaziak La Sonrisa de Nahia elkartera bideratu ziren, haurren minbiziaren ikerketa sustatzeko eta tratamenduak hobetzen laguntzeko.
Bide batez, Porsche Bilbao eta MEGA izan ziren topaketaren babesle.
Lehen edizioaren balorazioa "oso positiboa" izan da. Antolatzaileak bereziki nabarmendu du Euskal Herritik kanpo etorritako lagunei bertako errepideak eta paisaiak erakusteko aukera: "Plazera izan da bisitariei ingurua ezagutaraztea".
Drive&Rhythm ekimenaren lehen edizioak, beraz, automobilgintzarekiko zaletasuna elkartasunarekin uztartzeko balio izan du. Autoak, musika eta gizarte-konpromisoa ardatz dituen proposamenak lehen urratsa egin du horrela, etorkizunean jarraipena izan dezakeen topaketa baten abiapuntu gisa.