Amurrioko EH Bilduk oharra zabaldu du salatzeko Udalaren egoera ez dela jasangarria ekonomikoki "aurrekontuak 2 milioi baino gehiagoko defizita duelako eta gastua diru-sarrerak baino askoz handiagoa delako".
Koalizioak azaldu duenez, horrek eragina izan du egitasmo garrantzitsutan: "Kontu publikoak fiskalizatzen dituen sailak ia 600.000 euroko inbertsioak eta proiektuak geldiarazi ditu azken hilabetean, kreditua eskura ez izateagatik. Erabaki horren ondorioz, hainbat proiektu gelditu dira, hala nola eguneko zentro berria, frontoiaren proiektua idaztea, padel pistak hobetzea edo haurreskoletako plazak sortzea".
Gauzak hala, errealitatea ez onartzea leporatu die oposizioko taldeak EAJ zein PSE-EEri.
"Udal kontuek iraganean aurreztutako dirua badute ere, urteko gastuak soberan gainditzen ditu diru-sarrerak. Eta denok dakigu zer gertatzen den erabaki horiekin. Badakigu, halaber, Udala egoera arinduko duten aparteko diru-sarreren zain dagoela, baina ez dakigu noiz iritsiko diren. Hori da Amurrioko kontuen egungo egoera: egunean bizi da eta ezin da planifikatu kreditu faltagatik. Premiazkoa da egoera hori konponduko duten egiturazko neurriak hartzea ", aipatu du Jon Berganza EH Bilduko bozeramaileak.