Beste urte batez, Lezamako jaiak azaroko lehen egunak alaitzeko heldu dira. Kultura eta kirola uztartzen dituen egitarauarekin emango diete hasiera ospakizunei azaroaren 12an, ostegunean, San Martinen omenezko meza eginez.
Ondoren, zozketa egingo dute elizako arkupetan, eta 14:00etan 65 urtetik gorakoentzako bazkaria antolatu dute. Egunari amaiera emateko, txokolate jana egingo dute arratsaldeko seietan.
Hurrengo hitzordua azaroaren 14an izango da, egitarauko ekintza gehien biltzen dituen egunean. Ziklokrosak emango dio hasiera egunari goizeko hamaiketan.
Gero, 14:30ean, bazkaria egingo dute, eta arratsaldeko lauretan giroa berotzen hasiko da Iñaki Otegiren dantzaldiarekin. 19:00etan, aldiz, motozerrarekin egindako zuraren zizelkatzea ikusi ahalko da.
Afariak emango dio amaiera arratsaldeko ekintzei, 21:00etan. Gauean, berriz, Iraultza eta DJ Delgarro egongo dira giroa alaitzen 23:30etatik aurrera.
Amaiera
Igandea izango da jaien azken eguna, eta arratsalderako antolatu dituzte ekintzak. 16:30ean XV. Mus Txapelketan izena emateko epea irekiko dute, 20 euroko prezioan. Ordu erdi geroago ekingo diote txapelketari. Irabazleek honako sari hauek jasoko dituzte:
- 1. saria: Txapelak + 120€
- 2. saria: Botila sorta + 60€
- 3. saria: Botila sorta + 30€
Autobusak Lezamara
Urtero bezala, autobusak antolatu dituzte Lezamatik igo eta jaisteko. Igoera 23:15ean egingo dute Amurrio Antzoki ondotik. Itzulera, aldiz, goizaldeko 6:15ean izango da. Tiketak Amurrioko kultura etxean daude salgai atzotik.
