Tokiko produktuen topagune bihurtu nahi du Udalak Reforreko txoko zaharra

Txabi Alvarado Bañares

Reforren dago eraberrituko duten txokoa. / Amurrioko Udala

Sukaldeberri izena jarri diote egitasmoari, eta 147.465,39 euro baliatuko dituzte gehienez espazioa eraberritzeko. 

Sukaldeberri izeneko espazioa ireki nahi du Amurrioko Udalak Reforreko txoko zaharrean. Abiatu dute dagoeneko gunea egokitzeko lanen lizitazioa, 147.465,39 euroko gehienezko aurrekontuarekin. Hautatzen duten enpresak hiru hilabete izango ditu obrak egiteko. Gauzak hala, dena ondo bidean, datorren urtearen lehen txanparako egongo litzateke prest. 

Udalak azaldu duenez, “erabilera anitzeko espazio berri bat” izango da Sukaldeberri, “nekazaritzako elikagaien sektorerako topagune” izateko pentsatua. Argitu dutenez, egokituko duten txokoa Arabako Txakolina Jatorrizko Izendapenak kudeatu zuen bere garaian.

Orain, aldiz, “Amurrioko eta inguruko tokiko produktuari eta ondare enogastronomikoari balioa ematea” izango da espazioaren xedea. Horretarako, hainbat jarduera antolatzea aurreikusi dute azpiegitura berrian: tailerrak, prestakuntza jarduerak, ekitaldiak, dastatzeak eta topaketak, besteak beste. 

“Tradizio gastronomikoa berreskuratu” nahi dute horrela, espazioa “tokiko produktuen prestakuntzarako, dibulgaziorako eta sustapenerako topagune” bihurtuz. Hala azaldu du Txerra Molinuevok. Alkatearen hitzetan, proiektuak aukera emango du “ekoizleen lana balioan jartzeko eta gastronomiaren, lurraldearen eta garapen ekonomikoaren arteko lotura indartzeko”. 

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide