Espainiako Gobernuari eta Eusko Jaurlaritzari deia, Tubos Reunidosen etorkizunarekiko konpromisoa har dezaten

Aimar Gutierrez Bidarte

Tubos Reunidosen etorkizuna bermatzeko prozesua "buxatuta" dagoela ondorioztatuta, Espainiako Gobernuari zein Eusko Jaurlaritzari konpromiso zehatzak eskatu dizkie enpresa batzordeak gaur goizean egindako agerraldian.

Une erabakigarrian dago Tubos Reunidos enpresaren etorkizun industriala. Hartzekodunen konkurtsoa abiatu eta sei hilabetera bost erosle posible ditu enpresak, baina oraindik ere etorkizuna ez da ziurra. Egoera horren aurrean, agerraldia egin dute gaur goizean Tubos Reunidoseko langileen ordezkariek, Amurrioko fabrikako sarrera nagusian.

Aurrerapausoak erakundeei

Espainiako Gobernuaren menpekoak diren SEPI eta Estatuko Abokatutzaren papera kritikatu du langileen ordezkaritzak. “Tubos Reunidos enpresaren lantegien eta horien erabileraren bideragarritasunerako oztoporik handiena” direla azaldu dute, eta egoera “erabateko buxadura posizioan” dagoela salatu. Izan ere, bi organismoekin premiazko bilerak eskatu ditu enpresa batzordeak baina oraindik ez dute erantzunik jaso.

"Espainiako Gobernuak, Estatuko Abokatutzaren bidez, ezin du Merkataritza Epaitegian edozein prozedura inpugnatzen jarraitu"

“Tubos Reunidoseko zuzendaritzaren arduragabekeriak eta praxi txarrak ezin dute ekarri Tubos Reunidosek etorkizunik ez izatea eta ia 1.400 lanpostu galtzea, horietatik 900 Amurrion”, salatu dute goizeko agerraldian. Bide horretan gogorarazi dute SEPIri dagokiola “enpresa-jarduerari eusten laguntzea, sektore estrategikoak zaintzea eta enplegua babestea”.

Langileek aurrepausoa exijitu dizkiete erakundeei: “plantillak ahalegina egin du, orain erakundeak parean egotea nahi dugu”. Salatu dute "Espainiako Gobernuak, Estatuko Abokatutzaren bidez, ezin duela Merkataritza Epaitegian edozein prozedura inpugnatzen jarraitu". Izan ere, enpresa batzordearen iritziz, praktika horrek “etengabe oztopatzen du Tubos Reunidos enpresarentzat etorkizuneko proiektua egiteko aukera oro”.

“Ez da nahikoa inbertitzaileei lagunduko zaiela esatea. Azaldu behar da nola egingo den eta zer berme eskatuko diren lantegi guztietan jarduerari eta enpleguari eusteko”

Eusko Jaurlaritzan fokoa

Eusko Jaurlaritzaren gainean ere jarri nahi izan du fokoa langileen ordezkaritzak, eta Tubos Reunidosen etorkizun industriala bermatzeko konpromisoak zehazteko unea dela adierazi diote. Imanol Pradalesen gobernuak otsailean azaldu zuen prest zegoela “inbertitzaileei lagundu eta Tubos Reunidosi etorkizun industriala emateko”. Konpromiso horri eusteko galdegin diote langileek.

Enpresa Batzordeak bilera eskatu du Eusko Jaurlaritzarekin Tubos Reunidosek bizi duen egoeraren aurrean zer paper jokatzeko prest dagoen jakiteko: “Ez da nahikoa inbertitzaileei lagunduko zaiela esatea. Azaldu behar da nola egingo den eta zer berme eskatuko diren lantegi guztietan jarduerari eta enpleguari eusteko”.

“Plantillak Tubos Reunidos defendatu du”

Halaber, langileek Amurrioko 301 kaleratzeak gelditu eta enpresaren etorkizuna defendatzeko egindako ahalegina eta hartutako konpromisoak ere balioan jarri nahi izan ditu enpresa batzordeak gaurko agerraldian. 

“Denborak arrazoia eman diela” defendatu dute beharginek: “Tubos Reunidosen arazoak ez ziren konpontzen 301 pertsona kaleratuz, altzairutegia itxiz edo logistika kanporatuz. Jokoan zegoena askoz gehiago zen: enplegua eta enpresaren etorkizun industriala”.

Atzerapausorik emateko prest ez zeudela adierazi zuten greba mugagabea bertan behera utzi zutenean, eta erabaki horretan berretsi da gaur langileen ordezkaritza. Azken hilabeteetan abiatutako fase berria erne jarraitu dutela defendatu dute sindikatuek eta, hitz eman bezala, “irtenbide industrial bat eta enplegua defendatzeko behar diren ate guztiak” jotzen ari direla.

“Guk argi dugu zein den gure helburua, eta ez dugu hortik desbideratzeko asmorik”, aldarrikatu dute agerraldia bukatzeko. “Tubos Reunidos industria enpresa izaten jarraitzea nahi dugu, bere jarduerari eta lanpostuei eutsiko diena eta presente dagoen eskualdeetan etorkizuna izango duena. Horretarako proiektu industrial bat behar da eta konpromisoak eta bermeak behar dira. Zehazteko unea da”.

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide